Февраль аенда бакча эшләре

Агачларны яшәртү, ягъни ботакларын сирәкләү

Болай эшләү өч файда бирә:

Җимешләр эреләнә;

Җимеш бирәчәк ботаклар тизрәк үсәрга тотына һәм уңыш 20-60%ка арта;

Агачларның салкыннарга каршы торучанлыгы яхшыра, аларны авырулардан, төрле корткычлар һәм бөҗәкләрдән эшкәртү җиңеләя.

Кәүсәсен кыскарту

Оптималь биеклек – 2 м. Шулай җимешләрне җыярга да уңайлы. Кәүсәне скелет ботагыннан 1-2 см өстәнрәк кисәргә кирәк. Төп итеп калдырсаң, чериячәк һәм башында куыш барлыкка киләчәк. Ябалдашның эченә таба үскән барлык яшь ботаклардан арыну хәерле. Алар агачны куелата, һава һәм дымны тоткарлый – корткычларга һәм авыруларга уңай мохит тудыра.

Дөрес итеп сирәкләнгән агач касә формасында булырга тиеш – уртасында бушлык, барлык ботаклар тышкы якта.

Никадәрле сирәкләргә?

Бакчачыларда «ябалдаш аша чыпчык иркен очып чыгарга тиеш» дигән гыйбарә бар. Ә ян-як скелет ботакларының озынлыгы якынча 2,5 м булырга тиеш һәм аларны тышка карап торган кырый ботакка кисәләр.

Агачларны агарту

Гадәттә агачларны көзен агарталар. Кышын да ярый, иң мөһиме февраль уртасына кадәр өлгерергә кирәк. Чөнки февраль ахыры – март башында әле җебетеп, әле катырып, температура кискен уйный башлый. Шул сәбәпле кояш нурлары астында агачның кайрысы 20 градускача җылынырга, ә төнлә 20 градускача суынырга мөмкин. Аерма 40 градус! Шундый тирбәлеш аркасында кәүсә «пешү» алырга мөмкин һәм моннан аны бары тик агарту гына коткара. Моның өчен махсус водоэмульсия куллану кулай.

ФОТО: социаль челтәрләр.