Белгечләр «Экологик иминлек» милли проекты кысаларында урман фонды чикләрендәге йөзләгән термик ноктаны мониторинглауны дәвам итә.
Агымдагы янгын куркынычы сезонында Татарстан Республикасында бер генә урман янгыны да теркәлмәгән. Бу хакта ТР ДБУ «Урман янгыннары үзәге» хәбәр итте. Шулай да, төбәк диспетчер хезмәте урман фондына якын җирләрдә яну учакларын теркәвен дәвам итә: барлыгы 372 термик нокта һәм коры үсемлекләрне яндыруның 224 очрагы ачыкланган. Аларны табу һәм бетерү буенча оператив эш «Урманнарны саклау» федераль проекты кысаларында алып барыла.
Республика урман хуҗалыгы министрының беренче урынбасары Илгизәр Зарипов, урманнарда янгыннар булмаса да, хәл даими контрольне таләп итүен ассызыклады. Хәзерге вакытта төбәк территориясендә янгын куркынычының өченче классы урнаштырылган. Янгын куркынычы сезонын рәсми рәвештә ябу октябрь урталарында планлаштырыла, шуңа кадәр космик һәм җир өсте мониторингы өзлексез режимда башкарылачак.
Белгечләр көзге чорның үзенчәлекле куркынычлары булуы турында кисәтә. Бу вакытта янгын барлыкка килүнең төп сәбәпләре булып коры үлән һәм коелган яфраклар туплануы, шулай ук кешеләрнең саксыз гамәлләре тора. Бакча участокларында чүп яндырганда һәм гөмбә җыярга урманга барган чакта аеруча сак булырга кирәк.
Ведомство республикада яшәүчеләрне янгын куркынычсызлыгы кагыйдәләрен катгый үтәргә һәм урманнарда һәм алар янында ачык ут кабызмаска чакыра. Янгын яки төтен күргән очракта, шунда ук 112 бердәм коткару хезмәтләре номеры, шулай ук 8-800-100-94-00 һәм 8 (843) 221-37-95 телефоннары буенча «Урман янгыннары үзәге»нең кайнар линияләренә хәбәр итәргә кирәк. Вакытында шалтырату ут таралуны кисәтергә һәм төбәкнең табигый байлыкларын саклап калырга ярдәм итәчәк.
Нет комментариев