Спас районының сигез яшь гражданы беренче паспортларын алды

Бүген Спас районы ЗАГСында зур вакыйга – 14 яшен тутырган яшь гражданнарга беренче паспортларны тапшыру тантанасы булды. Чара «Без – Россия гражданнары» Бөтенроссия проекты кысаларында узды һәм Россия Көнен бәйрәм итүгә багышланды.

Тантана Россия Федерациясе һәм Татарстан Республикасы гимннары белән башланды. Алып баручы яшүсмерләрне тормышларында мөһим этаплары – илнең тулы хокуклы гражданнары статусын раслаучы төп документ алулары белән котлады.

Яшьләрне мактаулы кунаклар – Спас районы башкарма комитеты җитәкчесе Роман Исланов, Эчке эшләр министрлыгының Спас районы буенча бүлеге начальнигы Донат Усманов һәм Алдынгылар Хәрәкәтенең җирле бүлеге җитәкчесе Ольга Карпеченкова котлады.

Тантаналы шартларда сигез яшүсмергә паспортлар, истәлекле значоклар һәм бүләкләр тапшырылды. Документларны Константин Борюшкин, Данис Вафин, Азалия Гайфуллина, Алексей Грибанов, Василиса Зеленкова, Анна Купоросова, Гагик Маргарян һәм Юлия Потапова алды.

– Бүген сез олы тормышка мөһим адым ясадыгыз. Паспорт – ул документ кына түгел, ә сезнең хокукларыгыз, бурычларыгыз һәм бөек илдә яшәвегез символы. Сезнең тормышыгыз игелекле эшләр, белемгә омтылыш һәм халкыбызның традицион кыйммәтләренә тугрылык белән тулы булсын, – дип мөрәҗәгать итте тантанада катнашучыларга Ольга Карпеченкова.

Чара патриотик музыка астында истәлеккә уртак фотога төшү белән тәмамланды. 

Фото: Наталья Самородова.