Кичәбез күңелле үтте

Безнең бер бәйрәмебез дә башлангыч мәктәп укучыларыннан башка үтми. Бу юлы да алар кичәне әниләр, әбиләр турындагы матур шигырьләре, "Кәләпүшем-калфагым" җыры белән ачып җибәрделәр. Әлфинур Бохарова, Әлфирә Гайнуллина, Дамирә Мисалимова, Гөлназ Рәхмәтуллиналар гүзәл затлар турында язылган җырлар башкардылар.

Мәдәни чараларда без халкыбызның матур йолаларын, гореф-гадәтләрен чагылдырырга тырышабыз. Алар бит бары тик аралашып яшәргә, кунакчыл булырга, тәртипкә өнди. Шул максат белән без "Аулак өй" күренеше уйнадык. Аулак өйгә килгән кызларыбыз (Илсөяр Әхмәтҗанова, Гөлүсә Мисалимова, Алинә Сафина, Рамилә Шәфигуллина) каз каурые сыдыру, йон эрләү, бәйләү эшләрен җыр белән алып бардылар. Егетләр (Азат Әхмәтсафин, Нәфис Әхмәтҗанов, Ранис Гайнуллин, Зөлфәт Шәрипов) килгәч, такмак әйтеп биюләр, "Йөзек салыш" уены белән дәвам итте. Кыямов Илһамның "кунак кыз"ы булып уйнавы, Салахов Исламның гармунда "Авыл көе"н башкаруы зур тәэсир калдырды. Аулак өйнең хуҗалары кунакчыллык күрсәтеп, чәй табыны хәзерләделәр.

Кичәдән соң авыл кешеләренең әйткән рәхмәт сүзләре безгә әллә никадәр көч-куәт өстәде. Киләчәктә дә бәйрәмнәр-дән ямь табып, күмәк-ләшеп, куанып яшәргә һәм эшләргә язсын!