Акчалар гаризасыз, фондка таныклык бирелү турындагы мәгълүмат керүгә үк килә.
Татарстанда махсус хәрби операция ветераннарына фондка гариза белән мөрәҗәгать итәргә кирәкми. Айлык акчалата түләү автоматик рәвештә, Социаль фонд бүлегенә ветеран таныклыгы бирелү турындагы мәгълүмат керүгә үк билгеләнә. 2026 елда сугышчан хәрәкәтләр ветераннары өчен түләү күләме аена 4 838,63 сум тәшкил итә.
Билгеләү турындагы хәбәрнамә «Дәүләт хезмәтләре»ндәге шәхси кабинетка килә. Ветеранга акчаны ничек алырга икәнен сайлау гына кала: банк счетына яки почта аша. Түләү хокукы таныклык бирелгән көннән барлыкка килә. Ләкин факттагы күчерү датасы кешенең нинди тапшыру ысулын сайлавына бәйле.
Шул ук вакытта иске тәртип тә югалмый. Әгәр ниндидер сәбәпле автомат билгеләү эшләмәсә, ветеран үзе яки аның вәкиле гариза бирергә мөмкин. Түләү белән бергә ветеран социаль хезмәтләр җыелмасын ала. Бу – дарулар һәм медицина әйберләре, күрсәтмәләр булганда санаторий-курорт дәвалавы, шәһәр яны электричкаларында һәм дәвалау урынына бушлай йөрү. Беренче тапкыр билгеләгәндә җыелманың бәясе акча эквивалентында исәпкә алына.
«Безнең өчен ветераннарның тиешле дәүләт ярдәмен вакытында һәм өстәмә кыенлыкларсыз алулары мөһим. Түләүне автомат рәвештә билгеләү документлар җыю һәм аны рәсмиләштерү өчен мөрәҗәгать итү зарурлыгын бетерә. Барлык кирәкле мәгълүматлар ведомствоара үзара хезмәттәшлек кысаларында бүлеккә керә», — дип билгеләп үтте Татарстан Республикасы буенча Россия Социаль фонды бүлеге идарәчесе Эдуард Вафин.
Нет комментариев