Җәйге ял файдалы үтә

Болгардагы 2нче мәктәп коридорларында иртәдән балалар тавышы ишетелә башлый. Биредә "Игелек планетасы" исемле балалар мәйданчыгы эшли. Биш отрядта йөздән артык бала ял итә. Һәр отрядның үз билгесе, шигаре, җыры бар. Мәсәлән, " Игелеклеләр", "Шаяннар"… Балалар көн саен игелек, әдәплелек турында әңгәмәләр уздыралар. Башка чаралар да үткәрәләр. Кичен исә көн дәвамында башкарган эшләр махсус стендта чагылыш таба. Һәр көн үзенчә кызыклы. Музыканы да өйрәнәләр, спорт белән дә шөгыльләнәләр. Иң мөһиме - балаларны тәмле итеп ашаталар.

Бинаның икенче катында беренче урта мәктәпнең "Кояшкай" лагеры урнашкан. Лагерьда өч отряд бар, балалар анда бик теләп йөри. Смена тәмамланып килүгә карамастан, аларның күңеле күтәренке.

Кузнечиха укучылары да лагерь эшеннән бик канәгать. Алар биредә күп яңалыклар белән таныша. Өлкәнрәк сыйныфларда укучылар исә мәктәп бакчасында яшелчә үстерә. Кәбестә, кыяр, помидор, суган, кишер - кышын барысы да кирәк булачак. Бу төркемгә керүчеләр иртән мәктәпкә килгәч зарядка ясый, тәмле ашлар белән дә сыйлыйлар үзләрен. Кыскасы, лагерьда үткән унсигез көн һәр бала күңелендә онытылмас тәэсир калдырган.

Иске Рәҗәп балалары "Патриот" лагерында ял итә. Өч отрядтагы балаларның саны иллегә җитә. Лагерьда эшләүче педагоглар төп игътибарны балаларга патриотик тәрбия бирүгә, милли гореф-гадәтләрне өйрәнүгә бирә. Танылган язучыларның әсәрләре буенча спектакльләр кую өчен курчакларны балалар үзләре теккән. Өлкән сыйныф укучыларына җаваплы бурыч тапшырылган - алар мәктәп ашханәсе өчен яшелчә һәм җиләк-җимеш үстерә.

Балаларның ялы күңелле һәм файдалы үтсен өчен тырышалар мәктәпләрдә.