«Дәүләт хезмәтләре»ндә тавыш бирү 8 ноябрьгә кадәр дәвам итәчәк.
8 ноябрьгә кадәр Татарстанда яшәүчеләрнең 2027 елда мобиль элемтә кайда пәйда булачагына йогынты ясау мөмкинлеге бар. Сүз йөздән мең кешегә кадәр яшәүче авыллар турында. Нәкъ менә шундый торак пунктлар база станцияләрен урнаштыру программасына керә.
Узган тавыш бирү нәтиҗәләре буенча вышкалар Татарстанның 79 авылында пәйда булачак. Эшләрнең төп өлеше Балтач, Әгерҗе һәм Кукмара районнарына туры киләчәк.
Сайлауда 18 яше тулган гражданнар катнаша ала. Тавыш бирү кеше теркәлгән төбәктәге торак пункт өчен рөхсәт ителә. Шул ук вакытта кешенең үзе яшәгән авылны сайлавы мәҗбүри түгел – ул үзе белән бер төбәктә туганнары яки дуслары яшәгән торак пункт өчен дә тавыш бирә ала.
Үз фикерен белдерүнең ике ысулы бар. Беренчесе – «Дәүләт хезмәтләре» порталы аша. Моның өчен шәхси кабинетта авторизация узарга, эзләү юлына авыл исемен кертергә һәм сайлауны расларга кирәк. Икенче ысул – Россия Цифрлаштыру министрлыгына гади хат язу. Адрес: 123112, Мәскәү, Пресненская набережная, 10нчы йорт, 2нче корпус. Хатта үзенең исем-фамилиясен, теркәлү адресын һәм торак пункт исемен күрсәтергә кирәк. Әгәр документка берничә кеше кул куйса, һәр тавыш аерым исәпләнәчәк.
Билгеләп үтәргә кирәк, соңгы биш елда мобиль интернет 6800дән артык авылда үткәрелгән. Татарстан Республикасында исә 2022 елдан 2025 елга кадәр база станцияләре 274 авылда урнаштырылган. Эш «Цифрлы тигезсезлекне бетерү» федераль проекты һәм «Мәгълүмат икътисады һәм дәүләтнең цифрлы трансформациясе» милли проекты кысаларында алып барыла.
Нет комментариев