Татарстанда 15,5 меңнән артык мәдәният волонтеры эшли

Татарстанда иҗтимагый хәрәкәтнең 15 вәкиллегенә берләшкән 15,5 меңнән артык мәдәният волонтеры теркәлгән. ТР Мәдәният министрлыгының матбугат хезмәте хәбәр иткәнчә, хәрәкәтнең җирле бүлекчәләре биш муниципаль районда һәм Казанда уңышлы эшлиләр, «Яшьләр һәм балалар» милли проектына актив ярдәм итәләр.

Роберт Миңнуллин исемендәге Республика балалар китапханәсе һәм Н.И. Фешин исемендәге Казан сәнгать училищесы доброволецлык хәрәкәте үсешенең төп мәйданчыклары булып тора. 2025 елның өченче кварталында активистлар көче белән китапханә программаларын оештырудан алып, хәйрия акцияләренә кадәр 1,2 меңнән артык чара уздырылган.

"Ватанны саклаучылар елында волонтерларны мемориалларны һәм истәлекле урыннарны саклауга җәлеп итүгә аерым игътибар бирәбез, — дип билгеләп үтте ТР мәдәният министры урынбасары Дамир Натфуллин. - Бу эш Бөек Ватан сугышында Җиңүнең 80 еллыгында аеруча әһәмиятле".

Хәрәкәтнең Татарстан бүлеге, мәдәният волонтерлары саны буенча иң яхшы ун төбәк арасына кереп, берничә тапкыр Россиядә иң яхшысы дип танылды. Төбәк бүлеге җитәкчесе Гөлфия Мотыйгуллина «Мәдәният волонтерлары» программасын гамәлгә ашырганы һәм «Мин — ДоброТворец» проектын үстергәне өчен «Россия доброволецы» күкрәк билгесенә лаек булды.

2025 елның сентябрендә Мәдәният министрлыгы ярдәмендә 19 районнан 40 активистны берләштергән «МКМ: Яшьләр мәдәният Менеджмент» Республика форумы узды. Катнашучылар 2030 елга кадәр волонтерлык хәрәкәтен үстерү стратегиясе кысаларында биш перспективалы проект эшләделәр, хәрәкәтнең федераль дирекциясеннән 14 Рәхмәт хаты алдылар.