Спас районы авыл җирлекләрендә кадрларга кытлык сизелә

Кичә Спас районы администрациясендә узган традицион киңәшмәдә Кузнечиха авыл җирлеге башлыгы Радик Ибраһимов узган елда башкарылган эшләр турында отчет бирде.
Тулаем алганда, хәлләр канәгатьләнерлек. Җирлектә 4 зур фермер хуҗалыгы эшли, мөгезле эре терлек саны тотучы шәхси хуҗалыклар бар, үзмәшгульләр буларак рәсмиләштерелгән һөнәрчеләр эшли. Тулаем алганда, Кузнечиха авыл җирлегендә барлыгы 25 эшмәкәр бар.

"Авылларда яшәү өчен шартлар бар. Электр, интернет үткәрелде, юллар ясалды, мәктәп, балалар бакчасы, кибет, китапханә һәм мәдәният йорты эшли. Әмма без элеккечә үк кадрларга кытлык кичерәбез. Хәтта кибеткә сатучылар да таба алмыйбыз. Фермерлар да кадрлар кытлыгына зарланалар", - дип билгеләп үтте Радик Ибраһимов. 

Бүгенге көндә узган елгы эш нәтиҗәләре турында берничә авыл җирлеге отчет биреп өлгерде. Алар барысы да кадрлар җитмәүгә һәм авыл җирлегендә халыкның картаюына зарланалар.