Фәргат Мөхәммәтов ТР Спас районы башлыгы вәкаләтләрен вакытыннан алда калдырды

Спас районы башлыгы вазифасында 5 елдан артык эшләгән Фәргат Мөхәммәтов вакытыннан алда үз вәкаләтләрен тапшырды. Бу хакта 25 апрельдә Татарстан Республикасы Спас муниципаль район Советының чираттан тыш сессиясендә игълан ителде.

Совет утырышында ТР Дәүләт Советы Рәисе урынбасары Марат Әхмәтов, ТР Рәисе Аппараты җитәкчесенең беренче урынбасары Илнур Гарипов, ТР Дәүләт Советы депутаты Фоат Вәлиев, шулай ук район башлыгы урынбасарлары, район башкарма комитеты җитәкчелеге, авыл җирлеге башлыклары һәм район Советы депутатлары катнашты.

"Без бергәләшеп ковид та, СВО да, мобилизация дә уздык. Без беренчеләрдән булып Республика клиник хастаханәсе филиалы статусын алдык, безнең хастаханәне хәзер район клиник хастаханәсе җитәкли, бу безнең гражданнарны дәвалау мөмкинлекләрен киңәйтә. 2024 елда без 910 000 турист кабул иттек. Башка туризм комплекслары белән чагыштырганда, бу күп түгел кебек. Әмма районның саннарга күчерсәк, бер кешегә 115 турист килеп чыга. Бу бик зур сан. Гуманитар ярдәм җыюда катнашуыгыз өчен рәхмәт әйтәсем килә. Безнең башлыклар даими рәвештә хәрби операция зонасына гуманитар адреслы ярдәм алып баралар. Гомумән, СВО башыннан без беренчеләрдән булып анда йөри башладык, 30га якын җиңел машинаны шунда җибәрдек. Бу районда яшәүчеләрнең һәм иҗтимагый оешмаларның казанышы. Мәсәлән, һәр авыл җирлегендә ячейкалары булган ветераннар оешмасы бергәләп маскировка челтәрләре бәйли, окоп шәмнәре ясый, үлән чәйләре әзерли, фронтка ярдәм итү өчен барысын да эшли. Укучыларыбыз да һәрвакыт үзләренең нәтиҗәләре белән сөендерделәр, республика һәм Россия олимпиадаларында җиңәләр, актив иҗтимагый эшчәнлек алып баралар. Барыгызга да рәхмәт! Яңа башлангычларны хуплавыгыз һәм кыенлыклар алдында бирешмәвегез өчен рәхмәт!"–диде Фәргат Вәгыйзович үзенең чыгышында.

Татарстан Рәисе Рөстәм Миңнеханов Указы белән Фәргат Вәгыйзь улы Мөхәммәтов Татарстан Республикасының әһәмиятлелеге буенча икенче дәүләт бүләге – Дуслык ордены белән бүләкләнде.