Татарстан игенчеләре һава торышы күрсәткечләре белән эшләү өчен цифрлы ярдәмче алачаклар

Татарстанда агросәнәгать комплексы ихтыяҗлары өчен метеорология инфраструктурасын булдыру проекты актив үсеш ала. Кырлардан җыелган мәгълүматлар «Метеомониторинг» платформасында туплана, ул бүгенге көнгә республиканың 200дән артык хуҗалыгын берләштерә. Авыл хуҗалыгы җитештерүчеләре көн саен үз җирләрендәге һава шартлары турында оператив һәм дөрес мәгълүмат алалар.

Якын киләчәктәге планнарда – сервиска интеллектуаль модуль кертү. Яңа мөмкинлек һава торышы мәгълүматларын аналитик инструментлар: чәчүлекләрнең торышын бәяләү, кыр эшләренең финанс исәбен алу һәм календарь белән берләштерәчәк. Мондый алым аерым районнар өчен һәрвакытта да төгәл булмаган уртача фаразларга йөз тотмыйча, конкрет кырның шартларына мөмкин кадәр якынрак мәгълүматлар нигезендә карарлар кабул итәргә мөмкинлек бирәчәк.

Агропром белгечләре өчен эшкәртелә торган участоклар чикләрендә температура, дымлылык, явым-төшем һәм җил режимы турындагы белешмәләр аерым әһәмияткә ия. Нәкъ менә шушы күрсәткечләр ашламалар һәм үсемлекләрне яклау чараларын кертү вакытын дөрес исәпләргә, авырулар чыгуын фаразларга һәм уңайсыз һава торышы аркасында уңышны югалтуны булдырмаска ярдәм итә.

Проектның бурычы – югары технологияләрне һәр хуҗалык өчен аңлаешлы итү, кеше факторының йогынтысын киметү һәм җитештерү процессларының үтә күренмәлелеген арттыру. Метеочелтәрне киңәйтү һәм цифрлы ярдәмчене эшләтеп җибәрү төбәкнең игенчелек тармагын үстерүдә һәм аның азык-төлек иминлеген ныгытуда мөһим этап булачак. Инициатива «Азык-төлек иминлеген технологик тәэмин итү» милли проекты кысаларында гамәлгә ашырыла.