Спас районында 2026 елгы урып-җыю кампаниясе башланып китте

Бүген Спас районында бөртеклеләрне җыю сезоны ачылды. Уракка беренчеләрдән булып крестьян-фермер хуҗалыгы хезмәтчәннәре Айсылу Мөхәммәтова кереште. Инде көзге бодайның беренче тонналары саклауга җибәрелгән.

Быел район игенчеләренә 40 700 гектарда уңыш җыеп алырга туры киләчәк. Яңа уңышның беренче ашлыгы «Болгар ХПП» җәмгыятенә килә башлады.

Икмәк кабул итү предприятиесенең төп бурычы — ашлыкның сыйфатын билгеләү, аны складларга дөрес бүлү. Моның белән заманча җиһазландырылган лаборатория шөгыльләнә. Склад биналары тиешле әзерлек узган: дезинсекция һәм чүп-чардан чистарту үткәрелгән, ике киптерү-чистарту башнясы ашлык киптерергә һәм чистартырга әзер.

Республика күләмендә бөртекле культураларны саклау белән быел 39 оешма шөгыльләнә, алар арасында 16 элеватор һәм 23 ашлык эшкәртү һәм икмәк кабул итү предприятиесе бар. Гомумән алганда, алар 4 миллион тоннага якын ашлык кабул итәргә сәләтле.

Татарстанда бөртекле культураларның гомуми мәйданы бу сезонда 1 миллион 190 мең гектар тәшкил итә. Техник культуралар 727 мең гектарны били, азык культуралары — 616 мең гектар. Бөртеклеләрнең тулай җыемы 4,5 миллион тонна булыр дип көтелә. Моннан тыш, республика игенчеләре 2,3 миллион тонна шикәр чөгендере, шулай ук 1,3 миллион тонна бәрәңге һәм яшелчә җыеп алырга уйлыйлар.

Урып-җыю кампаниясенең уңышы күбесенчә техниканы вакытында әзерләүгә бәйле, һәм районның авыл хуҗалыгы җитештерүчеләре бу эшкә җаваплы караганнар. Басуларда эшләр дәвам итә.