Ел башыннан ТР Кадастр палатасына Интернет аша Кадастр исәбенә кую турында 64 меңгә якын гариза алынды

Электрон рәвештә бирелгән гаризалар барлык гаризаларның 60 проценттан артыгын тәшкил итә. ТР Кадастр палатасының матбугат хезмәте хәбәр итүенчә, бүгенге көндә интрнет аша учет органнары күрсәктән хезмәтләрнең барысын да алырга мөмкин. Кадастр учетына кую турында гариза бирергә, кадастр мәгълүматларын соратып алырга, күчемсез милектәге үзгәрешләрне исәпкә алырга гына түгел, аны учетка куярга, йорт яки җирне учеттан алырга, техник хатаны (төгәлсезлекләрне) төзәтергә һәм билгеле датага кадастр бәясе турында белешмә дә алырга була.

"Күрсәтелгән хезмәтләрнең күпчелеген, - дип сөйли ТР Кадастр палатасы җитәкчесе урынбасары Антон Самойлов, - Росреестр инде берничә ел буе күрсәтә. Шуңа карамастан, күчемсез милек базарына бәйле булучыларның күпчелеге моның өстенлекләренә бәя бирә алмый. Мәсәлән, безнең ярдәмнән башка гына кадастр мәгълүматларын соратып алу бик уңайлы. Моны кул астында компьютер булганда теләсә кайчан эшләргә мөмкин, офиска барып, банк яки терминаллар аша акча түләп вакытны уздырырга кирәкми. Тик әлегә ТР Кадастр палатасына бирелгән гаризаларның 32 проценты гына безгә электрон рәвештә килә". Антон Самойлов билгеләп үтүенчә, Интернет челтәре аша гариза бирүнең бер кыенлыгы юк. Росреестрның http://to16.rosreestr.ru/ рәсми сайтында "Электронные услуги и сервисы" бүлегендә тиешле хезмәтне сайлап алып, күчемсез милек объекты һәм гариза бирүче турында гади генә форманы тутырырга кирәк. Интернет аша банк картасыннан, кәрәзле телефон яки QIWI-кошелек аша түләргә була. Мәгълүматларны электрон санлы имза куелган электрон документ (электрон почта адресына җибәрелә) яки кәгазъ документ рәвешендә алырга мөмкин. Аны почта аша яки кадастр палатасынының күрсәтелгән филиалында алырга була. Шулай ук портал аша билгеле бер датага күчемсез милекнең кадастр бәясе турында белешмә дә соратып алырга мөмкин. Бу хезмәт күптән түгел генә кертелде һәм түләүсез башкарыла.

Халык файдалана ала торган яңалыкларның берсе - портал аша техник хатаны төзәтү, объектны кадастр учетыннан алу турында гаризалар бирү. Әгәр беренче очракта гаризаны теләсә кем бирә алса, икенче очракта моны милекнең хуҗасы гына эшли ала. Башка очраклардагы кебек, кадастрдан мәгълүматлар алу турында гаризадан тыш (бу очракта документлар кирәкми), документлар санлы цифралы имза белән расланырга тиеш. Аеруча бу кадастр палатасы хезмәтләреннән даими файдаланучы кадастр инженерларына, нотариусларга, судьяларга кирәк.

- Алар өчен хәзер альтернатив вариант та бар, - ди Антон Самойлов. - Кадастрның мәгълүмат ресурсына керү ачкычын алырга. Аның ярдәмендә, бары тик күчемсез милекнең адресын гына белеп, аның кадастр номеры, кадастр бәясе, мәйданы һәм башкалар турында мәгълүматлар алырга мөмкин. Бу ачкыч, икенче төрле әйткәндә, уникаль код, түләүсез бирелә һәм аның гамәлдән чыгу вакыты юк. Аны алучылар үзләрен кызыксындырган мәгълүматларны карый, шулай ук аларны электрон төстә кадастр паспорты, выписка яки белешмә, территориянең кадастр планы рәвешендә ала. Шул рәвешле соратып алынган мәгълүматлар гариза бирелгән көнне үк җибәрелә һәм бик арзанга төшә - бер объект өчен ике сумнан да артмый. Шулай итеп, физик затлар өчен 200 объект турында мәгълүматлар - 200 сум, 1000 объект турында - 1000 сум торачак.