Татарстанның өч районында язгы сулар аркасында күперләрне һәм йорт яны участокларын су баскан

Татарстанда язгы ташу дәвам итә. 3 апрель иртәсенә Лаеш, Буа һәм Кайбыч районнарында су басу зонасында 21 йорт яны участогы һәм ике күпер эләккән. Кешеләр зыян күрмәгән.

Лаеш районының Яңа Сокуры авылында кар сулары аркасында 10 йорт яны кишәрлегенә һәм урам-юл челтәренең бер өлешенә су чыккан. Су торак йортларга һәм социаль объектларга җитмәгән. Авылга транспорт проблемаларсыз уза. Халык белән әңгәмәләр уздырылган, эвакуация кирәкми.

Буа районында ике тәбәнәк күперне су баскан. Кыят авылында Зөя елгасында күпер өстендә ташу 20 сантиметрга җиткән. Черки-Килдураз авылында су күпердән 10 сантиметрга күтәрелгән. Ике торак пункт та тышкы дөньядан аерылмаган чөнки  Кыятта Кыят-Тоншерма-Буа урау юлы бар. Су белән тәэмин итү һәм медицина ярдәме нормада, азык-төлекне автолавкалар китерә.

Кайбыч районының Мәлки авылында Речная урамында 11 йорт яны кишәрлеген су баскан. Торак йортлар һәм социаль объектлар су басу зонасына кермәгән. Юллар үтә торган, эвакуация таләп ителми.

Вәзгыять контрольдә, яңа су басулар турында хәбәрләр әлегә алынмаган.