Татарстанда сугыш ветераннары ай саен 63 мең сумнан артык акча ала

Татарстанда Бөек Ватан сугышы ветераннарының айлык кереме берничә өлештән тора. Уртача алганда ул 63 мең сумнан артып китә. Бу суммага ике пенсия керә – картлык һәм инвалидлык буенча, шулай ук өстәмә түләүләр.

Сугыш хәрәкәтләрендә турыдан-туры катнашкан кешеләр ай саен картлык буенча иминият пенсиясе һәм инвалидлык буенча дәүләт пенсиясе ала. Аларга айлык акчалата түләү өстәлә. Бу категория өчен аның күләме — 6 595,78 сум. Монда социаль хезмәтләр җыелмасының бәясе дә кертелгән. Моннан тыш, аена тагын 1 000 сум өстәлә — бу өстәмә матди тәэмин итү.

Сугыш нәтиҗәсендә инвалидлык алган кешеләр өчен айлык акчалата түләү суммасы югарырак — 8 794,41 сум. Калганнары шул ук: ике пенсия һәм өстәмә мең сум.

Ветераннар елга бер мәртәбә 10 мең сум ала. Бу сумма Россия Президентының 2019 елның 24 апрелендәге Указы белән билгеләнгән.

Социаль фондның республика бүлеге җитәкчесе Эдуард Вафин белдергәнчә, хакимиятнең бурычы – илгә тынычлык бүләк итүчеләр турында кайгырту. Аның сүзләренчә, Татарстанда ветераннар тиешле акчаны вакытында һәм тулысынча алсын өчен барысын да эшлиләр. Ул ассызыклаганча, санап үтелгән түләүләр — дәүләт күрсәтә ала торган ярдәмнең бер өлеше генә.