Татарстанда санитария икеайлыгының арадаш нәтиҗәләре ясалды

Татарстан Республикасында апрель башында старт алган шәһәр һәм авылларны масштаблы язгы чистарту чарасы инде 298 меңгә якын битараф булмаган гражданны берләштерде. Бу вакыт эчендә волонтерлар, активистлар һәм җирле халык тырышлыгы белән төбәкнең яшел фонды 100 меңнән артык яңа агач һәм куак үсентесе белән тулыланды. Шул ук вакытта коммуналь хезмәтләр һәм өмәдә катнашучылар чүп-чарны бетерү буенча зур эш башкардылар: кыш дәвамында җыелган 231 мең кубометрга якын калдыклар җыелып, махсус полигоннарга чыгарылды.

Җыештыру белән беррәттән, күзәтчелек органнары табигатьне саклау кануннарының үтәлешен катгый контрольдә тота. Бүгенгә инспекторлар тарафыннан 2 648 төрле экологик хокук бозу очрагы теркәлгән, аларның өчтән бер өлешенә якыны — 991 очрак — турыдан-туры законсыз чүплекләр оештыру белән бәйле.

Тикшерүләр нәтиҗәсендә:

• Вәкаләтле ведомстволар 1 615 административ беркетмә төзегән;
• Язылган штрафларның гомуми суммасы 3,9 миллион сумнан арткан;
• Тагын 433 очракта җир хуҗаларына һәм җаваплы затларга рәсми кисәтүләр җибәрелгән.

Агымдагы сезонда юл инфраструктурасының чисталыгына аерым игътибар бирелә. Экология министрлыгы белгечләре «Юл хәрәкәте куркынычсызлыгы» ДБУдәге (ГБУ «Безопасность дорожного движения») хезмәттәшләре белән бергә Татарстанның барлык районнарында юл буе зоналарын җентекләп тикшереп, 43 тапкыр рейдка чыктылар.

Автомобиль трассалары буйлап транспорт комплексы предприятиеләре тырышлыгы белән 5 250 кубометр чүп-чар җыелды. Бу эшләргә 2,8 меңнән артык эшче һәм 246 берәмлек махсус техника җәлеп ителде.

Бердәм тикшерүләр тимер юлны да үз эченә алды: РЖД белгечләре белән берлектә экологлар Казан, Яр Чаллы, Бөгелмә, Лениногорск, Әлмәт шәһәрләрендә, шулай ук Яшел Үзән, Биектау, Ютазы, Тукай, Менделеевск һәм Зәй районнарында тимер юл буйларын тикшерделәр һәм барлыгы 97 кагыйдә бозу очрагын теркәделәр.

Законсыз чүплекләрне тиз арада табу өчен белгечләр авиацияне дә җәлеп иттеләр. Һава мониторингы 14 район территориясен үз эченә алды, алар арасында: Лаеш, Биектау, Арча, Балтач, Әтнә, Теләче, Балык Бистәсе, Чистай, Түбән Кама, Зәй, Сарман, Бөгелмә, Лениногорск һәм Яңа Чишмә районнары бар.

Инспекторларга татарстанлылар үзләре дә зур ярдәм күрсәтә. Икеайлык башланганнан бирле Экология министрлыгының җәмәгать кабул итү бүлмәсенә 638 гариза килгән:

• Законсыз чүплекләр турында — 262 хат;
• Су объектларындагы проблемалар буенча — 79 гариза;
• Атмосфера һавасының торышына кагылышлы — 69 мөрәҗәгать;
• Башка сораулар белән бәйле — 228 хат.

Ел башыннан бирле ведомство Татарстан халкыннан барлыгы 1 257 хат эшкәрткән.

Белешмә: Бу масштаблы экологик чара Татарстан Рәисе Рөстәм Миңнехановның  йөкләмәсе буенча үткәрелә. Барлык чаралар «Экологик иминлек» милли проектының төп максатларына булышлык итү өчен оештырылды һәм алар 31 майга кадәр дәвам итәчәк.