Татарстанда ракета һөҗүме куркынычы булганда нишләргә икәнлеген аңлаттылар

Бүген Татарстанда беренче тапкыр ракета һөҗүме куркынычы режимы игълан ителгәннән соң, күпләр ничек дөрес эш итәргә белмәүләре икәнлеген аңладылар. Шуның өчен Россия гадәттән тыш хәлләр министрлыгы төгәл инструкция чыгарды - аны истә калдырыгыз.

Хәбәр итү ике төрле була. Әгәр «Ракета һөҗүме куркынычына янау» игълан итсәләр - бу әлегә бар да тыныч, ләкин урамнан китү яхшырак дигән сүз. Теләсә кайсы бинага керегез һәм тәрәзәләрдән ераграк торыгыз.

Әгәр «Ракета һөҗүме куркынычы» сигналы яңгыраса - хәл җитдирәк. Ашыгыч рәвештә ышыклану урыны эзләргә кирәк: подвалга, җир асты кичүенә, паркингка яки, һич югы, тәрәзәсез бүлмәгә ышыкланырга кирәк.

Әйтик, сез фатирда, ә бомбоубежищега кадәр ерак ди. Иң элек тәрәзәләрне, газны, суны ябыгыз, электрны сүндерегез. Иң куркынычсыз урынны табыгыз — гадәттә бу ванна бүлмәсе, бәдрәф, коридор яки караңгы бүлмә. Ягъни тәрәзәләр булмаган һәм терәк диварлар булган теләсә нинди урын. Стена буендагы идәнгә утырыгыз.

Әгәр подвалга төшәргә вакыт һәм мөмкинлек бар икән, ул чагында башта тәрәзәләрне, газ һәм суны ябыгыз, утны сүндерегез. Документлар, телефон, акча, иң кирәкле әйберләрне җыегыз. Күршеләрне кисәтегез, балаларга, өлкәннәргә һәм инвалидларга ярдәм итегез. Шуннан соң гына ышык урынга төшегез.

Урамда яки транспортта: руль артында булсагыз, туктагыз. Автобус яки такси йөртүчедән дә шуны ук эшләвен сорагыз. Машинадан чыгыгыз һәм якындагы подвалны, җир асты кичүен, цоколь катын эзләгез. Андый урыннар булмаган очракта, су үткәрү торбалары астында ышыкланыгыз, бу өстә калуга караганда яхшырак.

Кая качарга ярамый? Монда ике нәрсәне истә калдыру мөһим. Беренчесе: машина астына — җиңел машина астына да, йөк машинасы астына да, автобус астына да качырга кирәкми. Бу сезне яклый алмаячак.

Икенчесе: йорт һәм кибет диварлары янында басып тормагыз. Шартлау дулкыны булган очракта, өстән пыяла кисәкләре һәм ватыклар очачак. Биналардан куркынычсыз ара - 30-50 метр.

Иң мөһиме — тынычлыкны сакларга һәм тиз эш итәргә.