Татарстанда пилотсыз очкычлар һөҗүме куркынычы булганда үзеңне ничек тотарга кирәклеген искә төшерделәр

Соңгы вакытта пилотсыз очкычлар һөҗүме куркынычы чынбарлыкка әйләнде. Бүген Татарстанда пилотсыз очкычлар һөҗүме куркынычы режимы төн уртасында кертелде һәм 12 сәгатькә якын дәвам итте.

Шулай ук республикада Түбән Кама һәм Алабуга шәһәрләренә БПЛА һөҗүме куркынычы игълан ителде. Моңа бәйле рәвештә Гадәттән тыш хәлләр министрлыгының Татарстан Республикасы буенча Баш идарәсе хәвеф сигналы яңгыраса, күктә шикле объект күренсә, нишләргә икәнен искә төшерә.

Өйдә яки эштә булсагыз

Куркыныч игълан иткәндә беренче эш итеп аскы катларга төшәргә кирәк. Иң яхшысы — подвал яки җир асты паркингы. Лифттан һич тә файдаланырга ярамый: электр уты сүнгән очракта сез тозакка эләгәчәксез.

Әгәр бинадан чыгып китү мөмкинлеге булмаса, фатирның иң сакланган өлешенә күчегез. Бу гадәттә тәрәзәләр булмаган, ә тирә-якта стеналар булган урын. Еш кына бу ванна бүлмәсе яки алгы бүлмә. Идәнгә утырыгыз да тәрәзәләрдән ераграк торыгыз.

Урамда булган очракта

Ачык урында кичекмәстән якындагы бинага ышыкланырга яки җир асты кичүенә төшәргә кирәк. Объектны якынрак карарга тырышмагыз.

Пилотсыз очкычны күргәч нишләргә?

Төп кагыйдә — үзеңә игътибар җәлеп итмәү. Дронның турыдан-туры күрү зонасына эләкмәскә тырышыгыз: я качыгыз, я ипләп кенә читкә китегез.

Пилотсыз очкыч белән янәшә мобиль телефоннар, рацияләр, навигаторлардан файдалану катгый тыела. Сигналлар аппарат белән идарә итүгә йогынты ясарга һәм детонация китереп чыгарырга мөмкин.

Әгәр дә сез дронны фотога яки видеога төшерергә өлгергәнсез икән —кадрларны интернетка куймагыз. Материалларны полиция хезмәткәрләренә тапшырыгыз, алар нишләргә икәнен беләләр. Социаль челтәрләрдә таралу дошманга һөҗүмнәрне төзәтергә ярдәм итә.

Пилотсыз очкыч яки аның ватыклары табылуы турында 112 номеры буенча хәбәр итәргә кирәк.

Ватыклар белән сак булыгыз

Бәреп төшерелгән дрон кисәкләренә тап булсагыз, аларга якын килмәгез, бигрәк тә кулыгыз белән кагылмагыз. Алар миналанырга яки башка куркыныч тудырырга мөмкин.

Файдалы киңәш

Коткаручылар телефонга «Россия гадәттән тыш хәлләр министрлыгы» мобиль кушымтасын куярга киңәш итә. Аның аша ашыгыч хәбәрләр килә — пилотсыз очкычлар һөҗүмнәреннән алып табигый һәлакәтләргә кадәр. Бу телевизордан яки матбугат чаралары хәбәр итүгә караганда тизрәк.