Татарстанда иң яхшы радиоэлектроника монтажчысын билгеләячәкләр

2026 елда Татарстанга «Үз һөнәренең остасы» Бөтенроссия конкурсының федераль этабын уздыруны ышанып тапшырдылар. Ярышлар «Радиоэлектроника аппаратурасы монтажчысы» номинациясендә узачак. Бу республиканың эшче кадрлар әзерләүдәге казанышларын тану һәм җирле белгечләр өчен җитди сынау.

Конкурс күптән инде эшче һөнәрләр арасында гади ярыш булудан туктады. Бүген бу бәйгедә эшче һөнәрләргә лаеклы игътибар бирелә, ә иң яхшылары — федераль дәрәҗәдә таныла. «Кадрлар» милли проектына кергән чара икътисадның квалификацияле белгечләргә ихтыяҗын канәгатьләндерүгә юнәлдерелгән.

Быел ярыш 25 номинациядә барачак. Алар арасында үзенчәлеклесе дә бар — «Икенче старт». Бу номинациядә өлкән яшьтә һөнәрен алыштырырга курыкмаган, яңадан укыган һәм үз һөнәренең чын остасына әверелгән кешеләр көч сынаша.

Татарстанның бу өлкәдә горурланырлык нәрсәләре бар. Узган ел якташларыбыз төрле дәрәҗәдәге 7 бүләк алып кайттылар. Агроном Рузил Зәкиев һәм слесарь-җыючы Азат Сибгатуллин алтын алдылар. Көмеш медальгә радиоэлектрон аппаратура монтажчысы Инсаф Сибгатов һәм слесарь-инструментальче Дамир Касыймов лаек булды. Бронза медальгә яшелчә үстерү остасы Раил Шакирҗанов, мехатроника һәм робототехника буенча белгеч Роман Гыйзетдинов һәм «Икенче старт» номинациясендә Станислав Нижегородцев лаек булды.

Хәзер республикага федераль этапны лаеклы кабул итәргә кирәк. Катнашучылар өчен бу үзләрен бөтен илгә таныту, төбәк өчен — кадрлар әзерләү дәрәҗәсен күрсәтү мөмкинлеге, ә гади тамашачылар өчен — эшче һөнәрләр мактаулы булуына инану өчен сәбәп.

Россиянең иң яхшы монтажчысы кем булачагы бик тиздән билгеле булачак.