Татарстанда бала тапкан авыл хатын-кызларына түләүләр артты

Татарстан Республикасы Министрлар Кабинеты 2026 елның 23 маенда Шәһәр тибындагы авылларда һәм бистәләрдә даими яшәүче һәм бала тапкан хатын-кызларга бер тапкыр бирелә торган түләүләрне арттыру турында Карар кабул итте. Документ 2018 елның 9 февралендәге 67 номерлы карарга үзгәрешләр кертә.

Яңа кагыйдәләр нигезендә, беренче бала тапкан өчен түләү күләме 50 мең сумнан 100 мең сумга кадәр арта. Әгәр хатын-кыз өченче яки аннан соңгы сабыйны тапса, сумма 100дән 200 мең сумга кадәр артачак. Шул ук вакытта яшь чикләүләре элеккечә калды: түләүне алуга 25 яшькә кадәрге беренче баласын, ә өченче һәм аннан соңгы балаларын 29 яшькә кадәр тапкан хатын-кызлар хокуклы.

Башка балалары булмаган яки ике баласы булган хатын-кызларга гына түләүне чикләгән элеккеге шарт документтан төшерелгән. Карарның 5 пункты үз көчен югалткан дип танылды.

Карарны Татарстан Республикасы Премьер-министры Алексей Песошин имзалады.

Исегезгә төшерәбез, түләү хокукына авыл җирендә яки шәһәр тибындагы поселокларда кимендә өч ел даими яшәүче хатын-кызлар ия. Түләүне «Россия эше» кадрлар үзәгендә яки «Дәүләт хезмәтләре» порталы аша рәсмиләштерергә мөмкин. Татарстан Хезмәт, халыкны эш белән тәэмин итү һәм социаль яклау министрлыгында ачыклык кертүләренчә, түләүләрнең артуы тормыш дәрәҗәсенең үсүе һәм авылда туучыларга өстәмә ярдәм күрсәтү зарурлыгы белән бәйле. 2026 ел башыннан түләүләрне республиканың 300дән артык хатын-кызы алган инде, ә 2025 елда ярдәм чарасыннан 1529 хатын-кыз файдаланган. Яңа чара документ рәсми басылып чыкканнан соң үз көченә керде.