Татарстанда 2026 елда 3 мең гаилә өчен 108 күп фатирлы йорт төзеләчәк

Татарстанда «Яшәү өчен инфраструктура» милли проектын гамәлгә ашыру дәвам итә. 2026 елда республикада 108 күп фатирлы йортны файдалануга тапшыру планлаштырыла. Аларның гомуми мәйданы 150,6 мең квадрат метр тәшкил итәчәк. Димәк, Татарстанда 3123 гаилә өй туе үткәрә алачак.

Саннарны ТР Рәисе каршындагы Дәүләт торак фонды матбугат хезмәте китерә. Ведомство сүзләре буенча, 2026 елның язына еллык план 40% ка диярлек үтәлгән. 1119 фатирлы 10 йорт файдалануга тапшырылган.

Торак төзелеше бөтен Татарстан буенча бара. Казанда 774 фатирлы биш торак комплексы төзелгән инде, тагын биш йорт төзелә башлаган - анда 1528 фатир булачак. Яр Чаллыда 942 фатирлы алты йорт төзелә. Түбән Камада һәркайсы 170әр фатирлы ике йорт төзелеше бара. Шулай ук Әгерҗе, Арча, Менделеевск, Кукмара, Сарман районнары һәм республиканың башка муниципалитетларында яңа йортлар барлыкка килә.

Социаль ипотека программасы Татарстанда 2005 елдан бирле гамәлдә һәм бүгенге көнгә кадәр Россия өчен уникаль булып кала. 21 ел эчендә аның буенча 8,5 миллион квадрат метрдан артык торак файдалануга тапшырылган. Аларның шартлары 138 меңнән артык гаиләгә кагыла.

Шартлар чыннан да отышлы. Еллык 7% белән ипотека 28,5 елга кадәр бирелә. Беренчел взнос 10% тан башлана. Фатирлар тулысынча әзер килеш сатыла, ә бәясе базарныкыннан 30% ка арзанрак тора. Өстәвенә, балалары туган гаиләләргә учетка басканнан соң 200 мең сум компенсация түләнә.