Татарстанда 19 меңнән артык гаилә ана капиталын проактив режимда алган

Узган ел республика социаль фонды бүлеге ана капиталына автомат режимда 20 меңгә якын сертификат рәсмиләштергән. Ата-аналарга документлар һәм чират торуга вакыт сарыф итәргә туры килмәгән – барысы да бала туганнан соң үзеннән-үзе эшләнгән.

Төбәк бүлеге җитәкчесе Эдуард Вафин сүзләре буеча, бөтен процедура ЗАГС органнарына бала туу турындагы язма килгәннән соң башлана. Аннан мәгълүматлар социаль фондка китә, анда электрон документ төзелә. Әзер сертификат Ддәүләт хезмәтләрендә ананың шәхси кабинетында була. Ата-анадан порталда алдан расланган отчет язмасы гына кирәк. Мондый гадиләштерелгән тәртип Татарстанда инде алтынчы ел гамәлдә тора.

Электрон сертификатны компьютерда сакларга яки кәгазьдә бастырырга мөмкин. Аның бернинди яраклылык срогы юк. Капитал суммасы ел саен 1 февральдән арта — индексация бөтен суммага да, әлегә сарыф ителмәгәнгә дә кагыла. Документны яңадан рәсмиләштерергә кирәкми: барлык үзгәрешләр автомат рәвештә бара. Түләүнең агымдагы күләмен яки калган акчаны теләсә кайсы вакытта шул ук дәүләт хезмәтләре порталында тикшерергә мөмкин.

Яңалык эшмәкәрләргә дә кагылды. Шәхси эшмәкәр буларак теркәлгән ата-аналар хәзер ана капиталын шәхси балалар бакчаларына, няня хезмәтенә яки теләсә нинди – төп һәм өстәмә белем алуга юнәлтә алалар. Моның өчен оешманың яки эшмәкәрнең белем бирү эшчәнлегенә лицензиясе булырга тиеш, ә социаль фондка хезмәтләрнең төгәл бәясе язылган килешүне алып килергә кирәк.