Татарстан пенсионерларына пенсияләрне цифрлы сумнарга күчерү турында ялган хәбәрләр җибәрәләр

Соңгы вакытта Татарстан халкы социаль челтәрләрдә һәм мессенджерларда борчулы хәбәрләр ала. Хәбәрләрдә пенсионерларны аларның түләүләрен ашыгыч рәвештә цифрлы сумнарга күчерәчәкләр дип куркыталар, һәм моны булдырмас өчен, кичекмәстән социаль яклауга барырга һәм гариза язарга кирәк дип кисәтәләр.

Россия Социаль фондының республика бүлеге хәбәр итүенчә, бу дөреслеккә туры килми. Пенсияләрне цифрлы формага күчерү юк, һәм бернинди гаризалар язу таләп ителми. Клиент хезмәтләрендә хәтта бу хәбәрләрдә күрсәтелә торган махсус бланклар да юк.

Белгечләр кисәтә: мондый хәбәрләрнең максаты — паника тудыру һәм кешеләрнең шәхси мәгълүматларын алу яки аларны мошенниклык схемаларына кертү. «Шул көнгә кадәр өлгерергә», «кул куярга», «танышларга тапшырырга» дигән чакырулар аеруча сагайтырга тиеш.

Татарстан буенча СФР бүлеге идарәчесе Эдуард Вафин сүзләренчә, мондый хәбәрләрнең барысы да ялган. Пенсияләрне түләү гадәти режимда башкарыла, һәм гражданнарга нинди дә булса өстәмә гамәлләр кылу таләп ителми. Республика халкын рәсми мәгълүмат чыганакларыннан гына файдаланырга чакыралар.

Пенсияләр һәм түләүләр турындагы ышанычлы мәгълүматны Фондның клиент хезмәтләрендә яки ведомствоның рәсми сайтында алырга мөмкин.