Татарстан яшьләре «иВолга» округ форумына 1200 гариза биргән

Татарстан яшьләре Идел буе федераль округының төп яшьләр вакыйгасына актив әзерләнәләр. ТР Яшьләр эшләре министрлыгы мәгълүматы буенча, бүгенге көндә республикадан «иВолга» форумында катнашу өчен 1200дән артык гариза килгән. Теркәлү 24 майга кадәр дәвам итәчәк.

29 апрельдә Самарада Идел буе федераль округының барлык 14 төбәге вәкилләре катнашында узган семинар-киңәшмәдә форумның концепциясе турында фикер алыштылар. Яшьләр сәясәте мәсьәләләре буенча аерым киңәшмәне Россия Федерациясе Президентының Идел буе федераль округындагы тулы вәкаләтле вәкиле урынбасары Олег Машковцев уздырды. Ул билгеләп үткәнчә, һәр төбәк үз юнәлеше өчен тулысынча җавап бирә.

Форум 24 июльдән 29 июльгә кадәр Самара өлкәсенең легендар Мастрюков аланында узачак. Быелның төп темасы – “Россия коды: Күптөрлелектә бердәмлек" Президент Владимир Путин игълан иткән Россия халыклары бердәмлеге елына аваздаш булып тора.
Традиция буенча катнашучыларны Жигулев тауларына караган 2-3 кешелек палаткалы шәһәрчек көтә. Уңайлы мохит булдыруга аерым игътибар биреләчәк: мәйданчыкта пандуслары һәм мөмкинлекләре чикләнгән кешеләр өчен махсус зоналары булган инклюзив шәһәрчек эшләячәк.

Татарстан яшьләр сәясәте өлкәсе белгечләренә юнәлдерелгән «Хезмәт коды» белем бирү сменасы өчен җаваплы итеп билгеләнде. Барлыгы гаризалар 8 юнәлеш буенча кабул ителә: «Арт-код», «Чакыру коды», «Белем коды», «Туризм коды», «Гаилә коды», «Медиа-код» һәм «Алдынгылар Хәрәкәте» активистлары өчен яңа «Алдынгылар коды».

Форумда катнашу бушлай. Гаризалар 24 майга кадәр “Росмолодежь.Форумы" сайтында кабул ителә.

Чара «Яшьләр һәм балалар» милли проекты кысаларында Росмолодежь һәм «Алдынгылар Хәрәкәте» ярдәмендә уздырыла.