Татарстан Яшьләр хөкүмәте өч яңа проект турында фикер алышты

ТР Яшьләр эшләре министрлыгында узган утырышта катнашучылар якын арада эшләтеп җибәрергә ниятләгән инициативалар турында фикер алыштылар. Игътибар үзәгендә экологик акция, иҗади конкурс һәм гадәти булмаган турист маршруты булды.

«Яшел десант» проекты авторы, Казан дәүләт энергетика университеты студенты Артем Хаҗиев куркыныч урыннарда – электр линиясе чыбыклары астында яки торба үткәргечләр зонасында үсүче яшь агачларны коткару планы турында сөйләде. Аларны куркынычсызрак урыннарга күчереп утыртырга җыеналар. Барысы йөздән дә ким булмаган үсентеләрне саклап калырга исәп тоталар.

Шул ук вакытта оештыручылар 9-12 яшьлек балалар өчен экология дәресләре үткәрәчәкләр, уеннар һәм күрсәтмә материаллар аша аларга урманнарны саклауның ни өчен мөһим булуын аңлатачаклар. 18 яшьтән 35 яшькә кадәрге яшьләр өчен «Россия тыюлыклары» интеллектуаль квиз әзерләгәннәр. Агарту чараларында кимендә 140 кеше катнашачак дип планлаштырыла.

Тагын бер тәкъдим – «Казан мәчеләре» проекты да хупланды. Башкарма директор Полина Атеева шәһәр буенча 15 бронза мәче сынын урнаштырырга тәкъдим итте. Һәр сын шәһәрнең истәлекле урынында урнаштырылачак, һәрберсенең үз тарихы булачак. QR-кодлар ярдәмендә үтеп баручылар алар белән бәйле шәһәр тарихларын белә алачак. Шулай итеп, гадәти сәфәр чын маҗарага әвереләчәк, ә Казанның яңа символы барлыкка киләчәк.

Өченче инициатива – яшь талантларга ярдәм итүгә юнәлдерелгән «Татарстан тавышы» иҗади проекты.

Утырышта катнашучылар билгеләп үткәнчә, өч инициатива да Яшьләр хөкүмәте эшенең төп өлкәләрен – экологияне, мәдәниятне һәм иҗатны үз эченә ала. Аларның максаты – яшьләргә үзләрен күрсәтү һәм төбәк үсешенә өлеш кертү мөмкинлеге бирү.