Татарстан буенча СФР бүлеге телефон аша алдаучыларның активлашуы турында кисәтә

Татарстан Республикасында Россия Социаль фонды вәкилләре исеменнән эш итүче җинаятьчеләрнең яңа дулкыны күзәтелә. Җинаятьчеләр өлкән яшьтәге кешеләрдән шәхси мәгълүматны алырга маташып, психологик басым ясау тактикасын кулланалар.

Алдау схемасы түбәндәгечә: мошенниклар пенсионерлар белән шәһәр телефоннары аша элемтәгә керәләр һәм үзләрен СФР хезмәткәрләре итеп таныштыралар. Сөйләшү барышында алар гражданның фамилиясе «җитмәгән иминият стажы» ачыкланган затларның махсус исемлегенә эләккән дип белдерәләр. Вазгыятьне җайга салу өчен, әңгәмәдәшләрне кискен рәвештә клиентлар хезмәтенә кабул итүгә язылырга мәҗбүр итәләр. Шул ук вакытта җинаятьчеләр «сөйләшүне аудиоязмага теркәү» кирәклеген бәян итәләр һәм СМС-тан махсус кодларны яки «шәхесне идентификацияләү» өчен паспорт мәгълүматларын сорыйлар, бу таләпләрне үтәмәгән очракта пенсия түләүләрен туктату белән яныйлар.

Россия Социаль фондының Татарстан Республикасы буенча бүлегендә бу гамәлләрнең ялган булуын ассызыклыйлар. Фонд белгечләре беркайчан да телефон аша мондый «хәбәр итү» белән шөгыльләнмиләр, кесә телефоны аша СНИЛС мәгълүматларын, паспорт белешмәләрен яки СМС-хәбәрләрдән раслау кодларын сорамыйлар. Телефон аша кичекмәстән язылуны таләп итә торган фамилияләр белән бернинди дә «ашыгыч исемлекләр» юк.

Россия СФРның Татарстан Республикасы буенча бүлеге идарәчесе Эдуард Вафин халыкка мондый гамәлләргә ышанмаска чакырды. Кешене пенсия тәэминатыннан мәхрүм итү белән янаган теләсә нинди шалтыратулар, һичшиксез, алдаучылардан килә.

Ведомство экспертлары үз-үзегезне саклау өчен ачык тәкъдимнәр бирәләр:

• Сезнең пенсия тупланмалары яки стажы турында сүз кузгаткан таныш булмаган затлар белән  сөйләшмәгез.
• Телефон аша теләсә нинди шәхси мәгълүматларны, СМС-тан кодларны яки документ номерларын хәбәр итү катгый тыела.
• Әгәр сезгә мондый шалтырату килсә, сөйләшүне шунда ук өзәргә кирәк. Мошенниклар тәкъдим иткән номерларга кире шалтыратмагыз.
• Пенсия счетыгызның статусында шик туган очракта, рәсми документлар белән Социаль фондның клиентлар хезмәтенә шәхсән мөрәҗәгать итү яки мәгълүматны рәсми элемтә каналлары аша тикшерү яхшырак.

Мондый гамәлләр ачыкланган очракта, гражданнар бу хәл турында шунда ук хокук саклау органнарына хәбәр итәргә тиеш. Игътибарлы булыгыз һәм акчаларыгызны җинаятьчеләрдән саклагыз.