Татарстан 2026 елда 55 предприятиедә хезмәт җитештерүчәнлеген арттыра

Татарстанда «Нәтиҗәле һәм конкурентлы икътисад» зур милли проектының бер өлеше булып торучы «Хезмәт җитештерүчәнлеге» федераль проекты гамәлдә. 2026 елда бизнеска түләүсез ярдәм күрсәтү буенча әлеге дәүләт программасына республиканың тагын 55 сәнәгать предприятиесе кушылачак. Бу хакта Татарстан Республикасы Сәнәгать һәм сәүдә министрлыгы хәбәр итте.

Проектның төп максаты - компанияләрне нәтиҗәлерәк эшләргә, ресурсларны азрак сарыф итәргә һәм күбрәк табыш алырга өйрәтү. Моның өчен дәүләт үз хисабына аларга экспертлар җибәрә. Бу белгечләр хезмәткәрләрне «сакчыл җитештерү» принципларына өйрәтәләр һәм алар белән бергә эш урыннарында ук яхшыртулар кертәләр.

"Татарстанда федераль проектта катнашучы компанияләрдә уртача икътисади файда 20 млн сум тәшкил итә. Проект предприятиеләргә экспертлар җәлеп итү мөмкинлеге бирә. Алынган белемнәр компанияләргә алга таба уңышны мөстәкыйль рәвештә киңәйтергә һәм ныгытырга мөмкинлек бирә", — дип аңлатты Татарстан Республикасы премьер-министры урынбасары — сәнәгать һәм сәүдә министры Олег Коробченко.

Экспертларның барлык хезмәтләре, катнашучылар өчен укыту һәм консультацияләр бушлай үткәрелә. Проектларны гамәлгә ашыруга 2026 елда дәүләт бюджетыннан 142,6 млн сум бүлеп бирелгән.

Сүз уңаеннан, 2025 елда сакчыл җитештерү программасында Татарстанның 33 шәһәр һәм районыннан 87 предприятие катнашты. Иң күп катнашучылар Казан (15), Әлмәт (11), Яр Чаллы (10), Түбән Кама (8) һәм Яшел Үзән (7) предприятиеләре.

Проект өстендә эш гадәттә ярты елга якын дәвам итә. 87 компаниянең 53е аны узган ел тәмамлаган, ә калганнары агымдагы елда тәмамлаячак.

Проектта катнашучылар процессларында югалтулар эзләүдә ярдәм алалар, җитештерүчәнлекне үстерү өчен заманча алымнар үзләштерәләр һәм мөстәкыйль рәвештә көчлерәк һәм конкурентлыкка сәләтлерәк булырга ярдәм итүче белемнәр алалар.