Ярты миллионга якын өлкән яшьтәге татарстанлы актив озын гомерне сайлаган

Татарстан Республикасында «Актив озын гомер» («Активное долголетие») республика программасының арадаш нәтиҗәләре ясалды. Бүгенгә бу программага 493,9 мең «көмеш яшьтәге» татарстанлы кушылган. Бу — яшь тулы канлы тормыштан баш тарту өчен сәбәп түгел дип карар кылган ярты миллионга якын кеше дигән сүз.

Программа ни өчен кирәк?

Проект «Гаилә» милли проектының «Өлкән буын» федераль юнәлеше кысаларында гамәлгә ашырыла. Проектның төп максаты — өлкән яшьтәге кешеләрнең физик һәм социаль активлыгын арттыру, аларның озаграк дәртле һәм сәламәт булып калуларына ирешү. Оештыручыларның фикеренчә, кеше кызыклы шөгыльләргә никадәр күбрәк җәлеп ителсә, аның тормыш сыйфаты да шулкадәр югары булачак.

Нинди шөгыльләр сайларга була?

Татарстан Республикасы Хезмәт, мәшгульлек һәм социаль яклау министрлыгында төп юнәлешләрне атадылар: спорт, мәдәни-ял чаралары, белем бирү проектлары һәм волонтерлык эшчәнлеге. Өлкән буын өчен барлыгы 1 840 төрле шөгыль каралган. Алар Татарстанның барлык 45 муниципаль берәмлегендә эшли, ягъни һәр районда да күңелгә якын шөгыль табарга мөмкин.

Ничек язылырга?

Кулланучыларга уңайлы булсын өчен, оештыручылар «Забота» порталында махсус «Алтын еллар» бүлеген булдырдылар. Анда кайсы төбәктә нинди дәресләр үткәнен күрсәтеп торучы интерактив карта бар. Шулай ук чараларның расписаниесен карап, шунда ук язылырга да була. Билгеләп үтәргә кирәк, бу мөмкинлектән инде 30 меңнән артык кеше файдаланган.

Кем нинди юнәлешне сайлый?

Статистика күрсәткәнчә, Татарстанның өлкән яшьтәге кешеләре иң актив рәвештә спорт һәм физик культураны сайлый — бу юнәлеш 349,6 мең катнашучыны җәлеп иткән. Икенче урында мәдәни-ял чаралары: аларга 123,1 мең кеше йөри. Белем бирү проектларын 13,4 мең пенсионер сайлаган, ә 7,8 мең «көмеш яшьтәге» кеше волонтерлык белән шөгыльләнә.