Иң көчлеләр җиңде!

автор, 28 февраль 2012 - 11:52

1016

Ватанны саклаучылар көне алдыннан район Мәдәният йортында "Ягез әле, егетләр!" конкурсы үткәрелде.

Конкурста дүрт команда-тармак технологияләре техникумы, шәһәр урта һәм кадетлар мәктәбе командалары катнашты. Ярышлар башланганчы тамашачыларны Болгар шәһәр башкарма комитеты җитәкчесе Алексей Тюленев котлады.

Конкурс визит карточкаларын күрсәтү белән башланды. Һәр команданың чыгышы үзенчә кызыклы булды.

Аннары конкурста катнашучылар тарих буенча дәүләтнең төрле үсеш этапларын, аның үткәнен, хәзергесен чагылдырган сорауларга җавап бирделәр, хәрби эш буенча белемнәрен тикшерделәр. Егетләр Калашников автоматын сүтеп җыюда, бәрәңгене тизрәк әрчүдә ярыштылар. Спорт конкурсында өлгерлектә, тапкырлыкта көч сынаштылар. Әлбәттә, берәүнең дә бирешәсе килмәде.

Өй эше дә бик мавыктыргыч булды: берәүләр армиягә алынучылар тормышыннан күренешләр куйды, икенчеләре монтажланган видеосюжет күрсәтте, өченчеләре җыр башкарды. Тамашачылар һәр чыгышны алкышлап тордылар.

Конкурслар арасындагы тәнәфестә күрсәтелгән чыгышлар да истә кала торган булды. Рөстәм Җиһангировның футбол фристайлы, Рамилә Исхакова, Татьяна Аристова, "Сеспель" ансамбле чыгышларын яратып кабул иттеләр.

Конкурста катнашучыларның барысы да үз осталыкларын күрсәтте. Жюрига җиңүчеләрне билгеләү җиңел булмады. Беренче урынга 1нче мәктәп егетләре лаек булды, икенче - 2нче мәктәп егетләре, өченче урынны техникум вәкилләре алды. Ә кадетлар мәктәп-интернаты командасы конкурсның абсолют җиңүчесе дип табылды.