Болгарда шәһәрне төзекләндерү буенча ачык тыңлаулар узды

Кичә Болгарда шәһәрне төзекләндерүгә багышланган ачык тыңлаулар узды. Анда Спас районы башлыгы Роман Исланов, оешма-ведомстволар, туризм тармагы вәкилләре, җәмәгать эшлеклеләре һәм яшьләр катнашты.

Очрашу барышында җәмәгать урыннарын үстерү, яңа ял итү зоналары булдыру һәм паркларны төзекләндерү турында фикер алыштылар. Яшьләрнең актив катнашуы оештыручыларны аеруча сөендерде.

"Фикер алышуга яшь буын кушылуы зур әһәмияткә ия. Бу аларның шәһәре, аларның киләчәге, һәм нәкъ менә алар монда яшәячәк, эшләячәк һәм балалар үстерәчәк. Без бик күп кызыклы фикерләр ишеттек, һәр тәкъдим каралачак. Барыгызга да активлыклары өчен рәхмәт — сезнең фикерегез безнең өчен төп үсеш коралы" — дип билгеләп үтте район башлыгы Роман Исланов.

Кергән барлык тәкъдимнәр шәһәрне төзекләндерү буенча киләчәк эшләрне планлаштырганда исәпкә алыначак.