Болгарда йөклеләр көнен билгеләп үттеләр

Спас район үзәк хастаханәсенең актлар залында йөкле хатыннар көненә багышланган бәйрәм чарасы узды. Бу көн бәйрәмнәрнең рәсми календаренә 2023 елдан кертелгән һәм елына ике тапкыр — 7 апрельдә һәм 7 октябрьдә билгеләп үтелә.

Очрашуда Болгардан һәм Спас районының башка торак пунктларыннан берничә йөкле хатын-кыз катнашты. Чараны Изге Авраамий чиркәве оештырды. Үзе дә берничә бала тәрбияләүче Спас округының социаль эшләр буенча ярдәмчесе иерей Александр Павлов катнашучыларны сәламләде һәм бу бәйрәмнең мәгънәсе, шулай ук йөкле вакытта хатын-кызларга игътибарның мөһимлеге турында сөйләде.

Кунаклар алдында чакырылган белгечләр чыгыш ясады. Табиб-гинеколог Галина Емельянова һәм табиб-педиатр Людмила Ермилова хатын-кызларны котладылар һәм бала табуга әзерләнү һәм яңа туган сабыйларны карау турында киңәшләрен бирделәр. ЗАГС бүлегенең әйдәп баручы белгече Людмила Шалашова яңа туган балаларны электрон рәвештә теркәү мөмкинлеге турында сөйләде. Мәшгульлек үзәгенең әйдәп баручы инспекторы Елена Разина «Кадрлар» проекты кысаларында булачак әниләрне бушлай укыту турында хәбәр итте. Социаль фонд бүлегенең баш белгеч-эксперты Наталья Малышкина йөкле хатыннар өчен пособиеләр турында мәгълүмат бирде.

Чараны алып баручы, Изге Авраамий чиркәвенең якшәмбе мәктәбе педагогы Ольга Козлова йөкле хатыннар көне һәм җәмгыятьнең булачак әниләргә карата сакчыл мөнәсәбәтен популярлаштыру турында сөйләде. Очрашу Ирина Швецова чыгышы белән тәмамланды, ул гаилә тематикасына берничә җыр башкарды.

Барлык кунакларга чиркәүдән бүләкләр тапшырылды. Чарадан фотоларны Наталья Вакурова ясады. Оештыручылар табиб-педиатрларга һәм гинекологларга яңа гомер барлыкка килү белән бәйле җаваплы миссияләре өчен рәхмәт белдерделәр.