5 меңнән артык Татарстан гаиләсе 10 мең сумга кадәр ана капиталы калдыгын алган

2026 ел башыннан Татарстанда 5 меңнән артык кеше ана капиталы калдыгыннан бер тапкыр бирелә торган түләү алу хокукыннан файдаланды. Сумма 10 мең сумнан артмый һәм гариза бирү мизгеленә сертификатта калган акча өлешенә тигез. Бу акчаны гаилә үз теләге буенча бернинди чикләүләрсез кулланырга хокуклы.

Түләү хокукына сертификатның барлык хуҗалары да ия. Керем дәрәҗәсе һәм балаларның яше әһәмияткә ия түгел. Акча алу өчен «Дәүләт хезмәтләре» порталы аша гариза юллау яки Татарстан буенча СФР бүлегенең клиент хезмәтенә килү дә җитә. Карар 12 эш көне эчендә кабул ителә, күчерүгә тагын 5 эш көне китә.

Мөһим шарт: акча керә торган счет нәкъ менә сертификат хуҗасы исеменә ачылырга тиеш. Тормыш иптәше яки башка туганнарның счеты бу максат өчен ярамый. Калдыкны «Дәүләт хезмәтләре»ндәге шәхси кабинетта, СФР клиент хезмәтендә яки КФҮдә тикшерергә мөмкин.

2026 елда ана капиталы күләме беренче балага 728 921 сум һәм икенче балага 963 243 сум тәшкил итә. Акчаларны торак шартларын яхшыртуга, балаларның белем алуына, ананың туплау пенсиясенә яки өч яшькә кадәрге балага айлык түләүләргә юнәлтергә рөхсәт ителә. Әгәр бу юнәлешләрне кулланганнан соң сертификатта 10 мең сум чикләрендә сумма калса, гаилә аны бер тапкыр алып, теләсә нинди ихтыяҗларга тота ала.

«Мондый мөмкинлек ана капиталы программасын тагын да сыгылмалырак итә. Гаиләләр хәтта аз акчаны да теләсә нинди ихтыяҗларга куллана ала, бу бигрәк тә күп кенә ата-аналар өчен актуаль», – дип билгеләп үтте Татарстан буенча СФР бүлеге идарәчесе Эдуард Вафин.