Спас районыннан педагог "Мактаулы остаз" медаленә лаек булды

Якташыбыз, КФУның ИПО фәнни-белем бирү үзәге җитәкчесе, педагогика фәннәре докторы, профессор Әнвәр Хуҗиәхмәтов "Мактаулы остаз" алтын медаленә лаек булды. Бүләкләү тантанасы Казанда узды. Бүләкне республиканың мәгариф министры Илсур Һадиуллин тапшырды.

Әнвәр Нуриәхмәт улының педагогик стажы 48 елга якын тәшкил итә. Хезмәт юлын ул сигезьеллык мәктәптә тарих укытучысы булып башлый, аннары директор, мәгариф министрлгыныда бүлек башлыгы, КФУ кафедра мөдире булып эшли.

Ул Атказанган фән эшлеклесе, РФ һәм ТР атказанган мәктәп укытучысы, Каюм Насыйри, Муса Җәлил, Дамир Сираҗиев исемендәге республика премияләре лауреаты, Хезмәт Кызыл Байрагы ордены белән бүләкләнгән. 453 эш, 16 монография, мәктәп һәм югары уку йортлары өчен утыздан артык дәреслек һәм пособиеләр бастырган.

Аның студентлары арасында фәннәр кандидаты һәм докторлары исемен алучылар шактый.

Якташыбызны югары бүләк белән котлыйбыз! Без Әнвәр Нуриәхмәтовичка нык сәламәтлек, остазлык һәм фәнни эшчәнлектә яңа уңышлар телибез.