Медальләр шундый якын иде...

Турнирда Казан, Чаллы, Зәй, Азнакай, Буа, Баулы, Кукмара командалары катнашты, ә безнең район данын икенче шәһәр урта мәктәбе укучылары яклады. Барлык катнашучылар да рейтинг нигезендә ике төркемгә бүленде, Чаллы, Кукмара һәм Азнакай баскетболчылары безнең көндәшләр булды. 

Беренче уенда безнең спортчылар кискен көрәштә чаллылыларны 29:26 исәбе белән җиңде. Икенче очрашуда уен тагын да кызыграк барды - уен дәвамында әле бер, әле икенче команда алга чыкты. Ахырда безнең егетләргә уңыш елмайды һәм алар кукмаралыларны 31:30 исәбе белән "кысрыклап чыгарды". Турнир хуҗалары - Азнакай баскетболчыларын безнең команда көрәшсез җиңде (46:28 исәбе белән). Нәтиҗәдә, өч җиңү яулап, Болгар командасы төркемдә беренче урынны алды һәм ярымфиналга чыкты. 

Финалга чыгу өчен көрәштә уенның беренче яртысында безнең команда өстенлекне алса да, соңыннан Баулы спортчыларына бирешә башладылар. Кайбер мизгелләрдә судьялар да хуҗалар ягында булды, нәтиҗәдә безнең команда 32:48 исәбе белән җиңелде. Өченче урын өчен Кукмара баскетболчылары белән очрашуда кискен көрәш уенның соңгы мизгелләренә кадәр дәвам итте, әмма бу юлы уңыш көндәшләренә елмайды — алар безнең егетләрдән өч очко отты (59:56). 

Шунысын да билгеләп үтәргә кирәк, турнир алдыннан команданың егет-кызлары авырып тордылар. Тик алар барыбер сынатмадылар.  Шуңа күрә команда мактауга гына лаек, чөнки аларга «КЭС - Баскет» республика финалы призерлары булу өчен бераз гына җитмәде бит. Команда өчен Никита һәм Степан Гладковлар, Кирилл Игнатьев, Данис Зиннәтуллин, Максим Федоров, Рәсил Закиров, Артем Юрков, Эмиль Шәрипов һәм Роман Кузнецов чыгыш ясады. Ә аларны турнирга Юрий Кузнецов, Андрей Шишкин һәм Павел Павликов әзерләде.