Урак темплары көчәя

Авыл хуҗалыгы һәм азык-төлек идарәсе мәгълүматларына караганда, кичәге көнгә амбарларга 7470 тонна бөртек кайтарылган, гектардан уртача 17,7 центнер уңыш чыга. Игеннәр 4230 гектарда җыеп суктырылган, бу барлык мәйданның 10 проценттан артыгын тәшкил итә. Комбайннар 4700 тонна арыш, 2000 тонна көзге бодай, 370 тонна арпа һәм 320 тонна борчак суктырган. "Востокзернопродукт "Болгар" җәмгыятендә һәр гектардан - 24, Тәлгат Шабанов крестьян (фермер) хуҗалыгында - 25, Александр Планинда 20,4 центнер уңыш чыга.

Эре хуҗалыкларның берсе саналган "Болгар Арыш" җәмгыятендә инде 2000 гектардан ашлык суктырылган. Биредәге басуларда 20 комбайн эшли, шуларның 4се - чит ил машиналары: ике "Мега" һәм ике "Тукано". "Востокзернопродукт" "Болгар" җәмгыяте басуларында исә биш "Мега" һәм ике "Лексион" эшли. Югары җитештерүчәнлеккә ия булган әлеге машиналар тәүлегенә 150 тоннадан артык ашлык суктыра ала.