Аны көтеп алалар

Ирина Телицина

Татьяна Пенькова Өчкүл авыл җирлегенең яртысын тәшкил иткән участокларның берсенә инде дистә елдан артык хезмәт күрсәтә. Аның эш көне басмаларны маршрут буенча тезүдән башлана. Аннары Татьяна Федоровна газета-журналларны урамнар һәм йортлар буенча бүлеп, адресларын яза. Моннан тыш, почта ташучыга заказлы хатларны, бандерольләрне һәм башка вак-төякне дә таратырга туры килә. Ә моның өчен аларны вакытында халыкка китереп җиткерергә генә түгел, авыл халкы белән уртак тел таба белергә дә кирәк. Авыл кешеләрен газета-журналларга яздыру да почта ташучының иң мөһим бурычларыннан берсе булып тора. Татьяна Федоровна моның нинди зур әһәмияткә ия булуын яхшы аңлап, бу эшне зур теләк белән башкара.

- Авылда районның "Новая жизнь" газетасын иң күп яздыралар, - дип билгеләп үтә ул. - Шулай ук "Вечерняя Казань", "Республика Татарстан" кебек республика көндәлек басмаларына да язылучылар шактый. Вакытлы матбугатка иң актив язылучылар арасыннан Нина Лифантьеваны, Альбина Емелюшинаны, Анатолий Смирновны атап үтте. Шулай итеп, атнасына өч тапкыр почта ташучы үзе хезмәт күрсәткән Почта, Бунчеев, Школьный, Садовый урамнары һәм алар янындагы тыкрыкларга газета-журналлар алып килә.

- Татьяна Федоровнаның авылда барысы да хөрмәт итәләр, - ди авыл җирлегенең хәрби учет буенча белгече Гүзәлия Хәмидуллина. - Ул халыкның бернинди үтенечен дә кире какмый, һәрвакыт ачык йөзле, тәмле телле. Ә күбесенчә өлкән яшьтә булган авыл халкы белән аралашуда бу бик зур роль уйный. Минемчә, авыл халкы белән уртак тел табып эшли белгән Татьяна Федоровна нәкъ үз урынында эшли.

Эшен бетергәннән соң Татьяна Федоровна өенә ашыга. Дистә еллар буе күнегелгән киң каешлы авыр сумкасын салып куйгач, ул көндәлек эшләренә керешә. Бүлмә гөлләрен үстерергә бик ярата. Ире Александр Иванович белән ике ул һәм кыз тәрбияләп үстергәннәр. Хәзер инде Пеньковларның өендә балалары белән оныклары иң көтеп алынган кадерле кунаклар.

Шушы дәвердә Татьяна Федоровна ничә чакрым юл үткәндер, анысы аңа билгеле түгел. Иң мөһиме - авылдашлары аны яраталар, һәрвакыт көтеп алалар. Шулай итеп, үзенең хезмәте белән ул башкаларга файда китерә.

Руслан Хәмидуллин фотосы.