Спас районының Татар Такталы халкы ифтарга җыелды (+ФОТО)

Кичә Спас районының Татар Такталы халкы ифтарга җыелды. Авыл халкыннан тыш, мәҗлестә читтән кайтучылар да катнашты.

Мөселман кардәшләребезне зурлап ифтар ашын оештырган Татарстан Дәүләт Советы депутаты Фоат Вәлиевка олысы-кечесе рәхмәт әйтте, аңа саулык, гаилә бәхете, эшендә һәм тормышында зурдан-зур уңышлар теләделәр. Спас районы имам-мөхтәсибе Фәргат хәзрәт Минсәгыйров та Такталы халкына изге теләкләрен күп итеп җиткерде:

– Рамазан ае – һәр мөселман кешесе өчен көтеп алган, тәкъвалык ае. Аллаһыбыз ризалыгына ирешергә омтылып, әҗер-саваплар өмет итеп, ураза тотабыз. Суның, икмәкнең һәр валчыгына кадәр тәмен тоярга мөмкинлек биргән ай,”- диде хәзрәт.

Ифтар мәҗлесе изге Коръәннән сүрә һәм аятьләр белән үрелеп барды. Ураза тотучылар еллар имин, күк йөзләребез аяз булсын, кешеләр кайгы-хәсрәт күрмәсен иде, дип теләкләр теләделәр.