Болгар ислам академиясе ректоры ТР Фәннәр академиясенең отчет җыелышында катнашты

Болгар ислам академиясе ректоры вазыйфаларын башкаручы Айнур Тимерханов республика башкаласында 8 февральдә узган ТР Фәннәр Академиясенең отчет җыелышында катнашты.

Академия президенты Мәгъзүм Сәлахов Фәннәр академиясенең узган елда эшчәнлеге нәтиҗәләре турында доклад белән чыгыш ясады. Ул республика Фәннәр академиясе бүлекләрендә һәм республика программалары кысаларында барган фәнни-тикшеренү эшләре турында сөйләде, шулай ук алынган грантлар һәм проектлар белән таныштырды.

Чыгышында ул шулай ук Фәннәр академиясе эшчәнлегенең киләчәккә юнәлешләрен билгеләде. Археология һәм татар халкының тарихы, ислам белеме, социологик-демографик тикшеренүләр, тел белеме, әдәбият белеме, икътисади тикшеренүләр, астрофизика кебек юнәлешләр элеккечә үк өстенлекле булып калалар.

Җыелышта шулай ук ТР Фәннәр академиясенең Дәүләт һәм ведомство бүләкләре һәм исемле премияләре тапшырылды.