Матурая бара йортлар, яңара...

Күп фатирлы йортларны капиталь ремонтлау буенча Федераль законны тормышка ашыру кысаларында “Спасагрострой” җәмгыяте коллективы бу объектта эшкә җәй башларында ук керешкән иде. Биредә иң беренчеләрдән булып йортның нигез өлешен, ягъни цоколен җылыттылар, яңа отмосткалар ясалды. Мондагы уңай үзгәрешләргә якындагы йортларда яшәүчеләр дә игътибар итми калмагандыр. Подъездлардагы иске агач тәрәзә яңаклары урынына яңасын, пластиктан эшләнгәнен куйдылар, тимер ишекләр урнаштырдылар. Проект-смета документлары тиешле экспертиза узганнан соң подряд оешмасы планда каралганча, суүткәргеч һәм канализация челтәрләрен капиталь ремонтлауга җиң сызганып кереште.

Йортта мастер Владимир Семенов җитәкчелегендәге сантехниклар звеносы эшли. Шунысын әйтергә кирәк, алар инде шәһәрдә торак йортларны төзекләндерү белән 2008 елдан бирле шөгыльләнә. Күп йортлардагы инженерлык челтәрләренә әлеге коллектив көче һәм тырышлыгы белән ремонт ясалган. Инде бай тәҗрибә дә туплаганнар, бу исә аларга объектларны планлаштырылган вакытта файдалануга тапшырырга ярдәм итә. Биредә эшнең сыйфатына һәрвакыт зур игътибар бирелә, йортларда яшәүчеләргә җайлы һәм уңайлы булсын өчен барысын да исәпкә алырга тырышалар.

Моннан тыш, төзүчеләр алдында ноябрь аена кадәр тагын бер күп фатирлы йортны төзекләндерү бурычы тора. Кыскасы, коллективның әле эше җитәрлек.