Яңа тормыш
  • Рус Тат
  • Әтисе һәм абыйсы үрнәгендә

    Безнең шәһәр егете Сергей Макаров армия хезмәтен тәмамлаганнан соң, гаилә традицияләрен дәвам итеп, контракт буенча хезмәт итәргә җыена.

    Олег ПАХОМОВ
    Сергейның әтисе Павел Михайлович та бөтен гомерен Ватанга хезмәт итүгә багышлаган, абыйсы Александр да хәзергә кадәр тормышын куркыныч астына куеп, Ватан алдындагы бурычын үти. Сергейның биографиясе хәрби комиссариатта частьләргә билгеләү комиссиясендә дә уңай тәэсир калдырган, күрәсең, чөнки аны Алтай краендагы стратегик әһәмияткә ия булган ракета гаскәрләренең яшерен частенә хезмәт итәргә җибәрәләр. Ул ай ярым яшь сугышчы мәктәбендә хәрби белем нигезләрен өйрәнә, аннары ракета дивизиясенең команда пунктына күчерәләр. Күпмедер вакыт тәҗрибәле хезмәттәшеннән осталыкка өйрәнә, ә ул киткәч, аның урынына билгелиләр.
    Дизельче-электрик буларак, көтмәгәндә энергия килү туктаганда часть объектларын электр энергиясе белән тәэмин итү дә аның бурычына керә. Бу объектларның зур стратегик әһәмияткә ия булуын исәпкә алып, аларга һәрвакыт хәрби дежурда торырга кирәк: алты сәгать саен бер группа икенчесен алыштырып торган. Моннан тыш, үзләренә ышанып тапшырылган җиһазларны төзек тоту өчен шактый вакыт һәм тырышлык таләп ителгән. Сергей монда да үзенең иң яхшы сыйфатларын күрсәтә. Әти-әнисе Светлана Васильевна белән Павел Михайлович исеменә часть командирлары җибәргән рәхмәт хатларында егетнең хәрби бурычын намус белән үтәве, һәр эшкә җаваплы каравы турында язалар. Үз бурычын җиренә җиткереп үтәгәне өчен Сергей берничә тапкыр "Хәрби дежурда торуы өчен" Мактау кәгазьләре белән бүләкләнә.
    Әлбәттә, армиядә хезмәт итү җиңеп булмый. Яшерен часть булганлыктан, хәтта увольнениегә дә җибәрмиләр. Кибетләргә дә аларны контракт буенча хезмәт итүче солдат белән генә чыгаралар. Физик хәзерлеккә зур игътибар бирәләр. Һәр өч ай саен 3 километрга кросс, турникта тартылу, йөгерү һәм кул көрәшеннән торган нормативлар тапшырырга туры килә, ә тапшыра алмаучыларны спорт белән тагын да күбрәк шөгыльләнергә мәҗбүр итәләр.
    Гаиләдә алган ныклы тәрбия аркасында Сергей солдат тормышына тиз күнегә. Әтисе озак еллар буе Ерак Көнчыгышта хезмәт итә, ә гаиләсе хәрби шәһәрчектә яши. Ул хәрби кешеләрнең тормышы белән кечкенәдән үк танышып үсә. Кадет интернат-мәктәбендә укуы, әтисе җитәкчелегендә "Регата" балалар иҗат станциясендә шөгыльләнүе дә зур роль уйный.
    Абыйсы Александр кайчандыр Сызрань шәһәрендәге югары хәрби һава көчләре училищесын тәмамлап, вертолетчы була. Хәзерге вакытта өлкән лейтенант Макаров хезмәт иткән часть Краснодар краенда урнашкан, хәрби заданиеләрне үтәргә кайнар нокталарга барырга туры килә. Аңа Чечняда һәм хәрби бурычын үтәү өчен башка урыннарга очарга туры килә.
    Ә Сергей җитди карарга килеп, контракт буенча хезмәт итәргә булган һәм хәзер кирәкле документлар әзерләп йөри. Шактый югары хезмәт хакы, армиядәге шартлар, дисциплина - ул боларның барысын да исәпкә алган. Киләчәктә ул үзе теләгән белгечлек буенча югары белем алырга хыяллана. Күптән түгел кабул ителгән закон буенча, егетнең хәрби билетындагы хәрби часть командиры рекомендациясе аңа теләсә кайсы югары уку йортына имтихансыз керү мөмкинлеге бирә. Ул армия хезмәтеннән аерылмыйча гына, бу мөмкинлектән файдаланырга җыена.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: