Яңгырлар комачаулый

автор, 26 апрель 2017 - 11:25

543

Авыл хуҗалыгы һәм азык-төлек идарәсе мәгълүматларына караганда, һава шартлары шәптән булмаса да, район басуларында уҗым культураларын тукландыру дәвам итә.

Әлегә бу агрочара 5300 гектарда башкарылган. Ә менә "Болгар ВЗП" кырларында узган атнадан бирле тукландыруны АН-2 самолетлары белән үткәрәләр. Бу хуҗалыкта уҗым культуралары 6150 гектар мәйдан били, 2500 гектардан артык көзге бодай һәм арышка инде тиешле ашламалар сибелгән. 300 гектардагы күпьеллык үлән мәйданнарында бу эш тулысынча башкарылган.

Район буенча күпьеллык үләннәр әлегә 1300 гектарда тырмаланган, бу барлык мәйданнарның 24 процентын тәшкил итә. Планин, Нургалиев, Минһаҗев, Мөхәммәтова фермер хуҗалыклары һәм "Авангард" җәмгыяте туңга сөрелә торган җирләрдә дым каплауга керешкән. Башка хуҗалыкларда чәчүлек орлыгын агулау эше актив башкарыла.