Игенчеләр быел да сынатмый

Олег Пахомов

Отрядта тәҗрибәле механизаторлар һәм шоферлар эшли, алар бу җирләрдә озак еллар Василий Степанович Еремин җитәкчелек иткән райтопсбыт хуҗалыгы булган еллардан ук хезмәт куялар.

Яхшы традицияләр бүгенге көндә дә дәвам итә, өлкәннәрне яшьләр алыштыра, алар тәҗрибәне яшьләргә тапшыралар. Бу игенчеләр өчен иң авыр килгән елларда да кыр эшләрен оешкан төстә үткәрергә һәм үстерелгән мул уңышны җитди югалтуларсыз җыеп алырга мөмкинлек бирә.

Владимир Пыров белән Александр Габитов кырда иртә яздан алып, көз беткәнче эшлиләр. Туфракның югары бонитетлы булуы һәм аны сыйфатлы итеп эшкәртү кайбер елларда минераль ашламалар кулланмыйча да, гектарыннан 20 центнерга кадәр уңыш җыеп алырга мөмкинлек бирә. Ә җирләрне тукландыру бу күрсәткечне бермә-бер арттыра гына. Шытымнарны тукландыру һәм химик эшкәртүне дә Владимир Михайлович башкарып чыга. Аның МТЗ-1221 тракторы сезон буе туктап торганы юк. Печән хәзерләү чорында ул тәүлек буе печән чаба, төргәкләр ясый. Бүгенге көндә ындыр табагына һәм икмәк кабул итү предприятиесенә ашлык ташый. Александр Габитов та аңардан калышмаска тырыша, машина йөртүчеләр Денис Камаев, Юрий Емельянов һәм башкалар да үз эшләрен җаваплылык тоеп башкаралар.

Александр Комаров коллективта күптән түгел эшли башлаган. Яшь булуына карамастан, шактый тәҗрибә туплап өлгергән. Әтисе - Гусиханың танылган механигы. Аның тырышлыгы аркасында егет техниканы да әйбәт белә. Урып-җыюның сыйфаты турында борчылмаска була. Аның ярдәмчесе Денис Заварихин да иптәшеннән үрнәк алырга тырыша. Егетләргә урак чорында үзләрен яхшы яктан күрсәтеп, шактый акча эшләргә мөмкинлек бирелгән.

- Барысы да тырышып эшли, - ди хуҗалык идарәчесе Александр Трифонов, - уңышның язмышы алар кулында. Башкача булмый да, чөнки җир бил бөгеп эшләсәң генә мул уңыш бирә...

Александр Михайлович үзе лаеклы ялда булса да, эштән башка тормышын күз алдына да китерә алмый.

Хуҗалык игенчеләре, механизаторлар быел да басуларда мул уңыш үстерү өчен күп тырышкан. Көзге бодайның гектары 25 центнерга кадәр уңыш биргән, аның шактый өлеше өченче класс таләпләренә җавап бирә, клейковинасы 23 процент. Башка күрсәткечләре буенча да югары стандарт таләпләренә җавап бирә. Игенчеләр быел арпа һәм бодайдан да мул уңыш җыеп алырга өметләнәләр.

Рәсемнәрдә: Денис Заварихин һәм Александр Комаров; Владимир Пыров.