Сәбәбе – кыска ялганыш

Беренче янгын Смирнов урамындагы йортларның берсендә чыккан. Йокы бүлмәсеннән куе төтен чыгуын күреп, хуҗабикә башта каушап калган. Аннан соң тиз генә балаларны урамга чыгарган һәм янгынчыларга хәбәр иткән. Санаулы минутлар эчендә килеп җиткән янгын сүндерүчеләрнең өлгерлеге аркасында, йокы бүлмәсендәге утны тиз сүндергәннәр һәм йортны саклап калганнар. Соңыннан ачыкланганча, янгын электр чыбыгындагы ялганыш нәтиҗәсендә килеп чыккан.
Икенче очракта Рабочий урамындагы йортларның берсендә чыккан янгынны сүндергәннәр. Йорттан күтәрелеп чыккан ут телләрен шул тирәдән узып баручылар күреп алган һәм коткаручыларга хәбәр иткән. Дөрес, янгын нәтиҗәсендә йортка күп зыян килгән, ә менә башка корылмаларны саклап кала алганнар. Янгын электр чыбыгының төзек булмавы нәтиҗәсендә килеп чыккан.