Татарстанда эш бирүчеләргә инвалидлар өчен эш урыннарына чыгымнар капланачак

Республика эшмәкәрләре һәм оешмалары инвалидлыгы булган кешеләрнең хезмәте өчен шартлар тудыруга компенсация ала ала. Татарстан буенча Россия Социаль фонды бүлеге бу максатларга субсидияләр бүлеп бирә. Кайтарып бирелгән акчаның максималь суммасы – бер эш урынына 200 мең сум.

Бу акчаларга махсуслаштырылган мебель, техник җайланмалар сатып алырга, җиһаз урнаштырырга яки өйдә эшләү өчен эш зонасын төзекләндерергә мөмкин.

Программа беренче һәм икенче төркем инвалидлыгы булган гражданнарны, шулай ук теләсә кайсы төркем сугыш хәрәкәтләре ветераннарын эшкә урнаштыруга юнәлдерелгән. Мәҗбүри шарт – хезмәт килешүе тулы эш көне белән ким дигәндә тугыз айга төзелергә тиеш. Мондый хезмәткәрнең эш хакы минималь хезмәт хакы күләменнән түбән була алмый.

Субсидия алу өчен эш бирүче хезмәткәрне рәсмиләштергәннән соң өч ай эчендә мәшгульлек үзәгенә гариза бирергә тиеш. Гаризага индивидуаль реабилитация программасын һәм эшнең үзенчәлеген исәпкә алып, тотылган чыгымнар турында документлар кушып бирелә.

Тикшерүдән соң мәгълүмат Татарстан буенча СФР бүлегенә юнәлдерелә. Барысы да дөрес рәсмиләштерелгән булса, эш бирүче реестрга кертелә, һәм 10 эш көне эчендә акчалар аның счетына керә.

Ведомствода билгеләп үткәннәренчә, бизнеска финанс ярдәме – мөһим социаль бурычны хәл итүгә кертелгән өлеш. Эш бирүчеләр акчаларны янга калдырып кына калмый, ә инвалидлыгы булган кешеләргә эш табарга, лаеклы хезмәт хакы алырга һәм үзләрен кирәкле итеп хис итәргә ярдәм итә. Тулырак мәгълүматны мәшгульлек үзәкләрендә белергә мөмкин. Белгечләр барлык сораулар буенча консультация бирергә әзер. Документлар тапшыру эш бирүчеләр өчен мөмкин булганча гадиләштерелгән. Гаризаларны республиканың барлык районнарында тапшырырга мөмкин.