МАКС мессенджерында Татарстанның онлайн-хезмәтләре буенча навигатор барлыкка килде

МАКС мессенджерында кулланучылар өчен кирәкле дәүләт һәм муниципаль интернет-хезмәтләрне эзләүне шактый гадиләштерә торган хезмәт барлыкка килде. Татарстан Республикасы Цифрлы үсеш министрлыгы матбугат хезмәтендә хәбәр итүләренчә, бу навигатор төбәкнең барлык төп мәйданчыкларын бер виртуаль панельгә берләштерә.

Навигатор «Бер тәрәзә» принцибы буенча эшли, Татарстан Рәисе, Татарстан Республикасы Хөкүмәте, Татарстан Республикасы Дәүләт Советы, Казан мэриясе, шулай ук республика министрлыклары һәм дәүләт комитетлары, шәһәр һәм район администрацияләренең рәсми интернет битләренә тиз керү мөмкинлеге бирә.

Ведомствода билгеләп үтүләренчә, төп хезмәтләр: ТР Дәүләт хезмәтләре порталы чат-ботына, Татарстан МФЦ чат-ботына һәм интернет-кабул итү бүлмәсенә экранга ике тапкыр басып күчәргә була.

Әйтик, республика «Дәүләт хезмәтләре» чат-боты аша табибка язылырга, салымнар түләргә, штрафлар булу-булмавын тикшерергә яки «Халык контроле»нә гариза җибәрергә мөмкин.

МФЦ чат-боты үз чиратында кабул итүгә читтән торып язылырга, филиалларның расписаниесен белергә, шулай ук документларның әзерлек статусын тикшерергә мөмкинлек бирә.

Интернет кабул итү бүлмәсе исә республиканың кызыксындырган теләсә кайсы ведомствосына мөрәҗәгать юлларга мөмкинлек бирә.

МАКС мессенджеры мөмкинлекләрен үстерү «Мәгълүматлар икътисады» милли проектының максатларына һәм бурычларына турыдан-туры җавап бирә. Аның максаты – гражданнар өчен уңайлы һәм һәркем файдалана алырлык цифрлы платформалар булдыру.