Татарстанның баш рухание – Болгарда

14 апрельдә шәһәребезнең яклаучысы булып саналган изге Авраамий Болгарскийның җәзалап үтерелүенә 790 ел тулды. Шушы уңайдан Казан һәм Татарстан баш рухание Изге Авраамий чиркәвендә гыйбадәт үткәрде.
Гыйбадәттә епархиянең Спас һәм башка бүлекләреннән килгән руханилар, Казанның дини семинариясе студентлары, күпсанлы шәһәр халкы һәм читтән килгән кунаклар катнашты. Гыйбадәт кылганнан соң, рухани халык белән аралашты.
Болгарда булу дәверендә митрополит шулай ук Спас районы башлыгы Камил Нугаев белән дә очрашты. Алар чиркәү тормышының үсешенә, яңа чиркәүләр төзү буенча хезмәттәшлек итү, социаль һәм яшьләр хәрәкәтенә кагылышлы һәм башка мөһим мәсьәләләр буенча фикер алыштылар.
Гыйбадәт тәмамланганнан соң, дини семинариядә укучылар борынгы Болгарда экскурсиядә булдылар.