Россия Федерациясендә автомобиль йөртү таныклыгы алу өчен 16 яшьтән имтихан тапшырырга рөхсәт бирделәр

Эчке эшләр министрлыгының яңа административ регламент проектында каралганча, транспорт чарасы белән идарә итү таныклыгы алу өчен имтиханны 16 яшьтән тапшырырга рөхсәт ителә. Документ проектында әйтелгәнчә, дәүләт хезмәтләреннән файдалану өчен гариза язучы имтихан тапшыруга һәм транспорт чарасы белән идарә итү таныклыгын алу өчен балигъ булмаган кандидатның вәкиле язма ризалык бирергә тиеш. Мондый язма ризалык 16 – 18 яшьлек затларга гына кирәк булачак. Гамәлдәге административ регламентта мондый нәрсә юк. Яңа регламент 2021 елның 1 апреленнән үз көченә керергә тиеш.