Мул уңыш алдылар

Биредә мәктәп яны участогы 1,5 гектар мәйданны алып тора. Монда төрле яшелчә культуралары, җиләк - җимеш агачлары бар. Мәшәкатьләр күп булса да, кышка мул итеп төрле әйберләр әзерлиләр. Быел, мәсәлән, алма киптергәннәр, ә карлыган, чия, кура җиләген, кара миләшне туңдырганнар. Барлыгы 250 килограмм суган җыеп алганнар, 50 банка кыяр һәм 35 банка помидор тозлаганнар. Иртә өлгерә торган кәбестәнең дә бер өлешен тозлап куйганнар. Ташкабактан икра ясаганнар, баклажаннан салат әзерләгәннәр. Патиссонны да тозлыйлар.

Калган яшелчәләрне балалар бакчасына сатканнар.

Быел мәктәпкә бик кирәкле мотоблок һәм насос алганнар. Моннан тыш, теплицаны тәртипкә китергәннәр һәм анда кыяр белән кәбестә иртә өлгергән. Хәзер яшел петрушка белән укроп үсеп утыра.

Татьяна Солёнова җитәкчелек иткән мәктәп яны участогында иртә яздан алып, көзгә кадәр күз явын алырдай чәчәкләр үсә.