Чәчүне ашыктыралар

Авыл хуҗалыгы һәм азык-төлек идарәсе мәгълүматларына караганда, 1 майга туңга сөрелгән 54,2 мең гектар җирләр тырмаланган, бу мәйданнарның 83 процентын тәшкил итә. Чәчүлек орлыгының 84 процентына инкрустация ясалган.

Чәчү планлаштырылган 39,9 мең гектарның 10300 гектарында башкарылган, бу 26 процент дигән сүз. Аның 5100 гектарын - арпа, 1300 - солы, 500 - борчак, 300 - бодай, 1600 - берьеллык үләннәр һәм үлән катнашмасы, 1300 - көнбагыш, 200 гектарын рапс алып тора.

Чәчү традицион ысул белән дә, энергияне саклау алымы белән дә алып барыла. Беренче очракта культивация бик тиз үткәрелә, механизаторлар шунда ук кырга чәчү агрегатларын алып чыгалар. Икенче очракта бу эшләр югары җитештерүчән комплекслар ярдәмендә башкарыла. Сергей Юрков, Фәргат Мөхәммәтов крестьян (фермер) хуҗалыкларында - өчәр, Александр Планин һәм башка хуҗалыкларда икешәр берәмлек шундый техника эшли. "Болгар "Востокзернопродукт" хуҗалыгында 2,5 мең гектардан артык җир чәчелгән. Берничә кечерәк хуҗалык чәчү эшләрен инде төгәлләгән.