Спас районы Ислам динен кабул итүгә 1100 ел тулуын бәйрәм итәргә әзер

Кичә ТР Министрлар Кабинетында Идел буе болгарларының Ислам динен кабул итүенә 1100 ел тулуын бәйрәм итүгә әзерлек темасына брифинг узды.

Видеоконференция режимында узган брифингта ТР Спас районы башлыгы Фәргат Мөхәммәтшин, район башкарма комитеты җитәкчесе Валерий Осокин һәм Болгар музей-тыюлыгы директоры Рамил Җиһаншин катнашты.
Фәргат Вәгыйзович докладында районда нинди әзерлек чаралары үткәрелүе турында хәбәр итте.

«Болгар музей-тыюлыгында эшләр узган ел ук башланган иде. Хәзерге вакытта барлык архитектура һәйкәлләрендә дә ремонт-реставрация эшләре башкарылган. Болгар цивилизациясе музее тулысынча тәртипкә китерелгән. Болгар шәһәр урыны тирәсендәге территориянең сакланышын һәм куркынычсызлыгын тәэмин итү өчен коймалар куелган. Туристларны күбрәк җәлеп итү өчен тыюлык территориясен һәм Болгар шәһәрен төзекләндерү буенча масштаблы эшләр башкарыла", – дип хәбәр итте район башлыгы.

Шулай ук Фәргат Мөхәммәтшин районда транспорт логистикасын яхшырту өчен Казан һәм күрше өлкәләр юнәлешендә юллар ремонтланганын билгеләп үтте.

Сүз уңаеннан, май бәйрәмнәрендә Спас тыюлыгы 50 меңнән артык туристны кабул иткән. Фәргат Мөхәммәтшин сүзләренә караганда, Болгар кунакларны кабул итәргә тулысынча әзер.